天水圍伯裘書院引入大陸AI批改學生中文作文 「獲國家教育部指導 批閱質素有保障!」

人工智能可以代替傳統老師嘅教學工作?天水圍萬鈞伯裘書院就引入大陸嘅人工智能批改作文嘅系統,指出學生寫作嘅錯字、錯詞、語法錯誤等問題,並提出改善建議。負責老師覺得,系統雖然有啲限制,例如認唔到繁體字同埋部分嘅修辭方法,但都提升到中一寫作興趣及成績,老師又慳返啲改簿嘅時間,下年會用埋落中二學生到。

伯裘書院喺今年年初嘅中一學生試用呢套AI評改系統。質素保證部首席主任張敬才指,呢個AI作文批閱平台係由大陸嚟,「獲教育部國家語言文字工作委員會語言智能研究中心指導,批閱質素有一定保障!」佢仲話之前都睇過香港本地研發嘅系統,但淨係可以改到錯字,唔夠佢哋學校用。

由於個系統喺大陸嚟,學生用電腦寫完篇文,要轉返做簡體字去俾套系統認。張主任就話,套系統用十秒就批晒篇文,就會畀埋分,好過以前人手要用成個禮拜去改文、指導。個系統仲可以畀啲文章內容嘅改善建議,例如標示錯別字、不準確用詞,建議參考用字、指出語法問題。張主任話,俾個人工智能過AI平台「教導」後,分數有明顯進步,成效顯著。

但張主任都承認呢套系統有局限,例如用擬人、誇張等修辭手法就會出現誤判,亦都唔識得認中港用詞嘅分別,例如「朱古力」(大陸會寫「巧克力」);但佢相信AI收集多啲數據,深度學習及分析之後,誤判問題會得以改善,而且個平台都應承校方會整返套繁體版。

伯裘書院中文科都幾鍾意玩花臣、搞綽頭。之前有報道話,佢哋都引入過虛擬實境遊戲(VR),俾學生置身古代環境,用孔子弟子嘅身份探討孔子嘅價值觀,從而提升學習動機及文言文學習能力。

#天水圍 #萬鈞伯裘書院 #中文作文 #DSE中文 #中文科 #中文教育 #香港教育 #大陸教育 #普通話 #繁體字 #簡體字 #普通話 #廣東話 #港語學

4.5 2 votes
Article Rating