藝發局3名藝術範疇主席請辭 陳錦成:俾《大公》起底跟蹤 不想影響家人

香港藝術發展局最近有兼任藝術組主席嘅3名委員請辭,分別係視覺藝術組陳錦成、音樂組周博賢同埋戲劇組李俊亮。陳錦成表示,今年初俾《大公報》記者跟蹤佢,唔希望影響家人,惟有完成今年度工作後辭職。

藝發局表示,今年 6 月及 8 月先後接獲 4 名委員以私人理由請辭,3 名民選代表所屬嘅藝術範疇主席職務,已交畀副主席接手;各委員已審批藝團年度資助申請嘅個案,所以未有對藝發局嘅運作造成影響。

今年 3 月起,《大公報》同《文匯報》多次撰文批評藝發局資助發行《理大圍城》嘅影意志及其資助單位。喺立法會議員容海恩指M+博物館嘅艾未未藏品散播仇恨之後,藝發局視覺藝術小組主席陳錦成就解釋艾未未作品寓意挑戰權威,希望容海恩呢類唔太認識文化藝術嘅人虛心去學。之後陳錦成就俾《大公報》定性為黃絲內鬼亂港撐暴,撰文攻擊。當時有親中組織要求局方嚴格執行「愛國者治港」,取消業界推選委員,杜絕藝發局變成「毒瘤小圈子」,亦要求所有委員必須通過「資格委員會」品格審查,須確保藝術範疇主席係「愛國者」。

據了解三人商討後決定一齊辭任。音樂製作人周博賢回應被親中報章失實指控,就坦言話希望辭任係希望針對佢哋個人嘅攻擊唔好牽連藝發局制度,「要擔心未來嘅香港發展進入更黑暗嘅狀態,實在多的是,藝術發展難以避免。」李俊亮亦都表示係考慮家人情況。

藝術發展局係政府指定全方位發展香港藝術嘅法定機構,大會下設6個委員會,包括管理、覆檢、策略、藝術支援、藝術推廣、審計,以及10個藝術組別,包括藝術行政、藝術評論、藝術教育、舞蹈、戲劇、電影及媒體藝術、文學、音樂、視覺藝術、戲曲;另設有藝術顧問和審批員。每年藝發局都會撥款資助香港藝術團體、藝術節目及出版藝術刊物。

#陳錦成 #周博賢 #李俊亮 #香港藝術 #藝術發展局 #藝發局 #藝術自由 #言論自由 #文化自由 #大公報 #文匯報 #香港視覺藝術 #香港音樂 #香港戲劇 #港語學

0 0 votes
Article Rating