因為疫情，世界各地嘅戲院一係唔開，一係就限制多多，搞到人氣動畫新世紀福音戰士即使喺日本3月迎來大結局，世界各地嘅劇迷都未有機會收睇。不過，Amazon Prime Video就獲得該片嘅獨家串流媒體播放權，喺幾日前（13號）已經喺全球各地上網有得睇。Amazon都誠意十足，整咗11種語言嘅配音版，仲要剪埋一齊，甚為自豪；但係可惜就淨係得國語版，冇廣東話版。

 

不過，比起配音，好多人批評字幕出錯多啲。有人發現繁體版字幕譯法奇奇怪怪，將「初號機」譯做「初代號」，「公主」譯做「陛下」，另外亦有錯別字，有人質疑「官方字幕比業餘更業餘」。

Amazon Prime Video 喺 Twitter 都坦承有呢個問題，部分中文字幕錯譯都已經修正。睇嚟遲幾日睇都未必係壞事呀。

呢套咁有歷史里程碑嘅劇場版電影，會唔會有廣東話配音，你又期唔期待呢？歡迎留言分享你嘅諗法！