最近差佬拘捕咗個理大嘅博士生，因為佢懷疑用鹽灑喺尖沙咀加連威老道一個水池上面嘅蝸牛身上。事件當然令到大眾嘩然，好多人覺得差佬係小題大做，但同時有啲律師同建制派立法會議員都為差佬拘捕辯解，話個博士生令到動物產生「不必要痛苦」，所以根據法例就係虐待動物。

何謂「不必要痛苦」？佢哋舉例話，劏雞殺鴨焗田螺呢啲進食，或者唔小心踩死蝸牛，呢啲唔係有心令蝸牛難受，就唔係「不必要痛苦」，博士生專登灑鹽整死蝸牛，但又唔係要食佢哋，就叫做虐待。另外亦都有網民話，其實蝸牛屬於害蟲，整死佢哋根本就同打曱甴、殺白蟻一樣，打害蟲根本唔應該俾人拉。

但如果你問一個生物學家，佢可能會答你呢啲討論都無意思，因為科學界其實一直都搵唔到，亦都普遍認為蝸牛冇痛覺系統。既然唔識痛，邊有痛苦可言？更加徨論產生「不必要嘅痛苦」。

首先蝸牛係屬於無脊椎動物。雖然同大部分生物一樣，蝸牛有反射系統，你見到佢遇上高溫、打擊會縮，但唔代表佢「識痛」。因為蝸牛同我哋或者貓狗呢啲哺乳動物唔同。我哋有複雜嘅大腦，外界刺激經疼痛嘅受體（nociceptor）、特有傳遞痛覺嘅神經纖維傳遞到大腦，形成「疼痛」嘅意識，所以我哋會理解腦神經系統類似嘅貓貓狗狗會痛。

但係，蝸牛冇疼痛受器，冇傳遞疼痛嘅a-delta同c神經纖維，又冇成熟嘅大腦系統[1]，可以點感受痛苦法？所以生物學家普遍都會認為蝸牛「唔識痛」。

蝸牛身上冇感覺神經嘅a-delta同c 神經纖維

所以一啲比較前衛嘅素食者，甚至會係會了解唔同生物有冇疼痛系統去決定食啲乜，唔食啲乜。除咗植物唔識痛之外，生蠔等冇腦袋嘅貝類，佢哋認為都可以食，咁樣先係以素食避免製造眾生嘅痛苦。

此外，搵方法去證明到蝸牛等生物感受到痛苦，應該都係諾貝爾生物學獎難度嘅課題，相信都唔係香港警察或者律政司可以做到。

[1]網上新聞話蝸牛得兩粒神經元。其實蝸牛都有11,000粒神經元，同貓760,000,000之數已經係差天共地。

 

文／陳樂行

作者為生物醫學畢業，研究草藥文獻。佢亦都係港語學嘅主席。

#蝸牛 #蝸牛案 #虐待動物 #殘酷對待動物 #腦神經 #疼痛科學 #神經元 #素食 #陳樂行 #港語學