中國教育部前日（27號）公布，要求學校唔好將打肺炎疫苗同返學掛勾，因為咁樣違反咗打疫苗嘅「知情、同意、自願原則」。但係，香港教育局同日更新指引，師生疫苗接種率達七成的學校或年級可以全日回校面授上課及進行課外活動，已完成接種第二劑疫苗滿14天嘅學生先可以參加陸運會、水運會等。

中國教育部嘅王登峰表示，疫苗接種要遵循一個基本嘅原則，就是「知情、同意、自願」。特別係對於中小學生來講，應該從加強宣傳疫苗嘅安全性同保護作用入手，唔會強逼學生打咗疫苗先返得學。佢話：「不鼓勵各地在出家門、出門和進校門的時候，把是否接種疫苗特別是家長，和共同居住的人是否接種疫苗作為能不能進校門的標準，既沒有這方面的要求，同時這種做法也是不合適的。」佢話教育部已經要求各地立即叫停呢一種做法。

相反，香港教育局新指引下，師生疫苗接種率達七成嘅學校或年級先可以全日回校面授上課，以及進行課外活動。喺新指引下，亦只容許已完成接種第二劑疫苗滿14天嘅學生參加水運會同陸運會。另外，社區疫苗接種中心日前開始俾學生攞「即日籌」，有中心表示已有數間學校預約，帶晒啲學生去中心打針。

#中國教育 #香港教育 #疫苗 #打針 #新冠病毒 #武漢肺炎 #水運會 #陸運會 #面授上課 #課外活動 #港語學