立法會教育事務委員會今日（3號）再次開會討論學校點推廣德育及公民教育(價值觀教育)，建制派議員紛紛獻策點樣「整治歪風」。教育事務委員會主席委員會主席、經民聯梁美芬就批評學生講粗口嘅現象，要求教育局由老師入手整治歪風。

梁美芬講述自己親身經歷，慨嘆身穿校服嘅名校生都粗口爛舌：「你睇下而家好多名校嗰啲著住校服喺地鐵真係粗口爛舌，我見到嗰啲女生十零歲，一上地鐵就喺度講粗口，完全唔覺得羞恥嘅。」指責係「出咗啲咁嘅老師，先會有啲咁嘅學生。」

佢認為通識科推行 13 年之後，令到年輕人價值觀俾人扭曲晒，當年嘅學生而家做晒老師，將歪風帶落而家嘅學生。佢建議要確保學生價值觀，就要由老師入手，等老師為咗「保住份工」循規蹈距：「如果啲學生出來冚唪唥講粗口，你哋咪要罰嗰間學校囉。」

教育局副局長回應指，當局喺老師嘅晉升培訓加強價值觀教育內容，強調老師要以身作則；如果老師有任何失德行為，局方都會嚴肅跟進。

#粗口 #講粗口 #香港學生 #香港教育 #價值觀 #價值觀教育 #梁美芬 #名校生 #立法會 #經民聯 #通識科 #公民教育 #港語學