聖保羅男女小學入學面試全用廣東話進行 「完成日常生活任務 觀察小朋友待人接物態度」

傳統直資名校聖保羅男女中學附屬小學前日(4號)喺網上舉辦小一入學簡介會,新任校長張慧純指,今年預計會收一百五十名學生。因為疫情,首輪面試連續兩年要喺網上進行,學生要喺鏡頭前,按老師嘅廣東話指示完成與日常生活有關嘅任務,按佢哋嘅溝通能力、專注力及待人接物態度作為甄選準則。

據了解,位於港島南區嘅聖保羅男女中學附屬小學,舊年收到超過四千九百份申請表,競逐一百五十個小一學額。前日家長簡介會更有近二千四百名家長收睇,可見學位炙手可熱,甚為搶手。

新任校長張慧純指,申請者要喺指定日期及時間內,按老師錄影內容嘅廣東話指示,完成用日常生活及經驗為題設計嘅任務,例如跟住老師做動作、介紹物品等,從而觀察學生嘅表達同思維能力等,期間家長要幫手拍片記錄,但唔需要出鏡。「評核會用廣東話進行,不過學生都可以用佢哋嘅母語去表達」連埋登入系統去到上傳影片等步驟,成個過程要一個鐘內完成,過咗鐘就冇得補交。

張校長又話,舊年有啲家長喺戶外拍片,搞到收音唔清唔楚。佢話雖然唔使剪片、整特效,但拍攝時要確保學生樣貌及聲音清晰,盡可能喺室內完成。「通知家長面試日期後,每名申請者將會喺評核之前一個禮拜,獲安排系統測試時段,去完成一個模擬測試活動,確保評核當日順利進行」。

首輪面試結束後,學校會甄選約五百人進入下一輪面試,預計於十一月中旬至十二月,以實體面見形式進行。張慧純指,屆時學生將會同校長、副校長和主任會面,家長亦會獲邀同校長見面,成個流程長約三十至四十五分鐘,「兩輪面試獨立計分,取錄與否,將取決於學生次輪面試表現」。

甄選準則方面,張慧純稱主要視乎學生嘅溝通能力、專注力及待人接物嘅態度等表現,希望佢哋可以「喜愛學習、具好奇心、樂於分享、擅於溝通」,取錄結果暫定明年一月下旬公布。

聖保羅男女小學學年小一全年學費為六萬三千元,校方將透過「幼稚園提名(助學)計畫」,取錄不多於小一學位半成、即約七個學額,俾獲幼稚園校長推薦,品學兼優嘅清貧學生。

#聖保羅男女中學附屬小學 #傳統名校 #直資學校 #小一入學 #聖保羅 #聖保羅男女中學 #聖保羅男女小學 #入學面試 #網上面試 #廣東話 #日常生活 #小學生 #拍片 #港語學