愛爾蘭增設中文科考試但繁體字當錯字 港人籲聯署反對歧視

愛爾蘭將會喺2022年嘅增設中文考試,但教育部長 Norma Foley 就同愛爾蘭嘅華人講,因為課程係針對「愛爾蘭人」同唔識中文嘅國際學生而設,所以喺考試中使用繁體中文都會被認為係錯誤。當地嘅華人社區發起聯署,指責呢個決定唔單止係對愛爾蘭傳統漢語學習者嘅歧視,亦都限制咗中文學生嘅選擇,更加違背愛爾蘭政府話要建立多元社會嘅目標。

聲明指,Norma Foley話繁體中文淨係啱更進階嘅學生去學,證明佢哋根本唔了解中文。繁體字雖然筆劃多,但唔代表難學。發起人引述研究話根據研究,其實繁體字更加容易俾小朋友去閱讀,而簡體中文更容易學去點寫,根本各有不同,唔需要將繁體視為進階嘅中文內容。正如美式英語同英式英語喺愛爾蘭都視為正確,政府應該歡迎兩種中文字,俾人可以有得揀。而且,足夠專業嘅中文老師都會識得晒兩種中文字,政府唔需要額外增加太多資源。聲明又指出,英國、美國和加拿大嘅大學中文課程都提供繁體和簡體兩種選擇,質疑愛爾蘭點解唔可以採取同樣做法。

聯署者要求將簡體中文同繁體中文打印喺同一張中文試卷,並且兩種形式嘅中文都被接受為正確答案。

專頁「港女在愛爾蘭」呼籲,希望大家都能參加簽名運動以示支持,「為愛爾蘭這一代和下一代締造一個多元、公正的社會環境。」

#愛爾蘭 #愛爾蘭中文 #愛爾蘭港人 #學習中文 #中文教育 #繁體字 #正體字 #簡體字 #港語學

聯署連結:https://www.change.org/p/norma-foley-refused-to-recognise-traditional-chinese-in-the-leaving-cert-mandarin-exam-based-on-insufficient-knowledge-on-the-language

5 3 votes
Article Rating