《世紀帝國4》本周末限時開放試玩 考據古時語言配音 吟住唐詩大戰莎士比亞? 可選 中國 英國 神聖羅馬帝國 阿拔斯王朝(附下載連結)

上個月《世紀帝國4》封測影片流出,俾中文玩家發現今集遊戲竟然係復古咁用唐宋口音、古英語去配音營造歷史氛圍,令到好多歷史迷都拍節擊賞。今個禮拜《世紀帝國4》又突然話開放技術壓力測試,喺今個星期六日(18、19號)可以免費下載試玩!

下載連結:https://store.steampowered.com/app/1466860/Age_of_Empires_IV/

試玩可以揀第3個:Join the Age of Empires IV Technical Stress Test

呢次係要試下伺服器同系統頂唔頂得順眾多玩家一齊打機,所以唔似封測咁只有限定嘅玩家先玩得。不過,電腦配備都需要達到最低配備規格,要安裝額外軟件確保你嘅電腦配置合格。今次主要都係俾大家玩多人對戰同新手任務,等官方攞多啲數據,等正式遊戲上市嗰時可以更加順暢。今次會俾大家揀英國、中國、神聖羅馬帝國同阿拔斯王朝四個文明用,並且有五個地圖可以選擇。

目前喺 Xbox Insider Hub 同Steam 上已經出現 Techncal Stress Test 測試嘅掣,撳落去等收電郵通知就得喇。

遊戲大作《世紀帝國4》篤定10月28號喺Xbox同Steam推出,有啲玩緊封測版嘅中國玩家上載咗試玩片段,當中嘅中古漢語配就令到好多網民震驚。今集着重實踐歷史(Hands on History),為玩家深度呈現歷史樣貌,帶畀玩家更全面且生動嘅方式嚟認識歷史,遊戲製作團隊無論喺建槃、衣着、軍事上都做咗仔細嘅考據,今集更加入「古語配音」,會俾玩家隨住時代唔同聽到村民口音變化,由視覺以至聽覺感受到時代升級後煥然一新。

遊戲可以選用嘅文明包括英國、中國、德里蘇丹國、蒙古、法國、阿拔斯王朝、神聖羅馬帝國與俄羅斯。遊戲選取中國907年至1644年,唐宋元明四代。喺遊戲設定,中國嘅單位主要都係講北方話,但係玩家聽落去就覺得好驚訝,因為似廣東話多啲。不過,隨住時代演變,尤其元朝過後玩家聽到嘅配音會越來越貼近現代嘅普通話。