Signal 新增廣東話界面 消委會:程式簡潔易用 私隱度高

之前因為WhatsApp新增嘅私隱條款,惹來全世界對資料安全嘅擔憂,大家紛紛轉用Signal,多咗成1000萬人,其中香港區估計都多咗幾十萬人用。隨住香港用戶數量大增,Signal亦都相當「識做」,最近更新就喺界面語言加入香港人嘅母語——廣東話!

 

呢個模式只有Android機先可以用。電話預設都係繁體中文,但只要你喺程式右上角嘅功能列揀「設定」->「介面設定」->「語言選項」揀「Cantonese(traditional)粵語」就得㗎喇。轉咗之後嘅語言相當地道,例如寫住「開個新谷」、「冚唪唥剔低話睇咗」,十分有親切感!

 

Signal除咗貼心之外,其他嘢表現都唔差嘅。消委會喺上個月將佢同其他apps比較,都大讚「介面設計簡潔易用,傳送訊息時強制使用雙重認證,私隱度較高」,而且程式提供較多保障私隱嘅功能,包括傳送一次性照片、模糊照片面部功能、訊息閱後即焚同埋「唔俾cap圖」,好適合注重網絡安全嘅香港人!

 

港語學記者年頭開始用signal,都發覺啲bugs都漸漸搞掂晒,係有心嘅,值得支持!

#signal #息爐 #廣東話 #粵語 #廣東話界面 #中文界面 #網絡安全 #私隱 #私隱安全 #港語學

 

4.7 3 votes
Article Rating