眼見港人無償翻譯廣東話教材 美國基督教機構推出免費粵語聖經動畫課程

時代論壇報道,位於美國、製作聖經動畫短片嘅「聖經工程」(Bible Project)幾年前已經推出廣東話版嘅聖經動畫短片,希望令更多人簡單噉認識聖經故事。繼早前推出粵語「讀聖經」系列(Read Scripture),佢哋最近再推出「路加福音—使徒行傳」系列。

有份參與「聖經工程」廣東話版嘅事工、Vine Church青少年牧者Chapman Fu話,呢次嘅「路加福音——使徒行傳」系列,由佢同視博恩(CBN)香港團隊合作,視博恩嘅同工首會先改「聖經工程」嘅文稿,之後佢就同另一位同工做錄音。Chapman Fu預計,之後「聖經工程」亦會推出「將臨期(Advent)」系列同「點樣讀聖經(How to read the Bible)」系列。

Chapman Fu話,香港其實都有唔少弟兄姊妹留意到「聖經工程」嘅片,而且喺未有廣東話版之前會自行翻譯,再錄製影片放上網,可見「聖經工程」嘅廣東話版有一定需求。佢相信呢啲片會幫到弟兄姊妹更容易掌握聖經內容、綱要同一啲神學主題。「我哋好多時對聖經嘅學習,容易流於金句式嘅背誦,或者喺主日聽道時以段落形式去理解。但係,「聖經工程」嘅片係要幫我哋睇到成本聖經係一個上下一致、既連貫又完整嘅故事,有它嘅主題同脈絡」,大家亦能夠喺呢個連貫嘅故事裏面搵到自己嘅身份。

呢啲片並唔流於硬知識層面。Chapman Fu認為神喺字裡行間亦向弟兄姊妹講緊嘢,佢分享每次入錄音室望著稿讀嘅時候,往往到總結嘅部份,佢都會被訊息所感動,可見神嘅話語仍然透過有千年以上歷史嘅聖經向今日嘅信徒講嘢。

「聖經工程」係一間位於美國嘅非營利基督教機構,由麥基(Timothy Mackie)同柯林(Jon Collins)一同創立。自二〇一三年起,佢哋主要創作簡短嘅聖經動畫同其他聖經資源,推出嘅片至今已經翻譯成四十二種語言。其中一個早期嘅知名項目,係同出名嘅美籍華裔牧師陳恩藩(Francis Chan)合作嘅「讀聖經」系列。約莫喺二〇一五、一六年,佢哋推出粵語版「讀聖經」嘅短片,令觀眾透過動畫快速噉睇晒聖經各個經卷;另外,亦有一啲以聖經主題為主嘅動畫,例如彌賽亞、贖罪、聖靈等。

(註︰另外,而家網上有好多粵語聖經,畀尤其是老一輩眼力唔係咁好嘅人,以聽嘅方式,追隨上帝嘅話語。)

整理:Alan

#聖經故事 #聖經 #廣東話聖經 #粵語聖經 #香港教會 #香港基督教 #基督教 #廣東話 #粵語 #港語學