施政報告未有著墨「增設普通話門檻」 分析指香港普通話教育根本已飽和 硬推更會後患無窮

林鄭月娥今日(6號)發表施政報告,除咗土地政策被受關注之外,好多人都關心林鄭會唔會推出教育嘅新措施。自從《大灣區語言報告》建議加強本港普通話教育後,由黨媒到立法會議員亦紛紛撰文獻計附和,加油添醋。然而,「雷聲大,雨點小」,林鄭嘅教育政策重點都係擺喺國家安全教育,無提到普通話教育,消息人士透露,政府內部評估香港普通話課程根本已經飽和,再改變政策都未必可以取得良好效果,反而可能後患無窮。

上兩個月,民建聯主席李慧琼建議,政府要鼓勵學校以普通話教授其他學科,以及喺公務員招聘考試中增設普通話語文能力測試,但當時就俾公務員事務局回應話「現行嘅安排行之有效,未有計劃」。呢兩個月內唔同黨媒都有文章呼籲喺施政報告加入類似措施,但今次施政報告都係只提國家安全教育,喺普通話未有再點樣著墨。

有消息人士透露,添馬檻中人其實都做過內部評估,認為香港學童現時已經接受緊九年嘅必修普通話教育,再加額外措施都未必會有太大成效。相反,如果將普通話變成升學或公務員入職考核,對吸納人才未見好處之餘,更可能引發更大一波嘅移民潮同公務員嘅離職潮,連本來政治中立嘅人才都會離去。

加上學校上下都仲係適應緊國民教育、國歌及國旗教育等諸多新政,教育界無暇同一時間應付太多新措施;教育局執行「谷針」指示又未如理想,好多學校寧願繼續返半晝堂,都唔敢師生全體打針去換全日上堂,林鄭政府都係「一動不如一靜」,等教育界適應咗國安教育再算。

#林鄭月娥 #施政報告 #教育政策 #普通話 #普通話門檻 #普通話畢業要求 #普通話考試 #普教中 #普教X #李慧琼 #香港政府 #國民教育 #國安教育 #移民潮 #公務員 #離職潮 #廣東話 #港語學

0 0 votes
Article Rating