劉穎匡作監獄廣東歌排行榜 聽Dear Jane林欣彤勵志 「我最在意始終係香港語言文化保唔保存到落去」

雖然47人初選案嘅劉穎匡收押喺荔枝角收押所已經超過半年,佢仍然成日透過書信喺社交平台發表文章,同大家分享喺獄中嘅所思所想。本身識得廣東話填詞嘅佢,最近就憑住喺獄中電台廣播嘅歌曲,做咗個廣東歌「荔枝角排行榜」。

佢話,呢個「荔枝角排行榜」冇任何規則、冇任何邏輯,「只係純粹按我主觀喜好再加少少穿鑿附會嘅評論,如果我長期好鍾意呢首歌可能連續好多個禮拜擺佢喺第一位都得。事不宜遲,就等我公布我嚴選嘅第一期荔枝角排行榜啦!」
1st 《人類不宜飛行》Dear Jane
喺寂寞灰心嘅時候,聽到呢首勵志歌係感動到有種毛管戙嘅感覺,呢首歌得意嘅地方係第一次聽嘅時候覺得冇乜特別,但係越聽得多就越有feel,呢期最鍾意嘅歌詞係「誰永遠不倒永遠不改永遠不合襯,而永遠很短天天更新。」講緊再看似不可能嘅嘢都總會有轉機,再困難都要堅持落去。人類今日連上太空都做到,有乜嘢係永遠都冇可能呢?令我都諗返起我哋以前成日都話喺柏林圍牆倒下前一日都冇人知道圍牆咁快就會倒塌,或者一切真係有少少希望。
2nd 《鐵樹》林欣彤
呢個星期又再聽咗呢首歌幾次,坦白講以歌輪歌真係比較平凡,但係啲歌詞實在太適合我宜家呢個狀態聽。獨處係喺監獄入面最難面對嘅課題,點樣擺脫負面諗法,做到「驕傲地獨處」的確需要好好學習。聽住呢首歌都叫做可以勉勵下自己,所以擺喺第二位。
3rd 跌嘢唔好搵
4th 真話的清高
5th 還有四十八小時

劉穎匡話,佢最在意始終係香港語言文能否保存,所以特別鍾意聽903《廣東歌關注組》嘅節目。佢發現原來而家嘅下一代香港人,包括中學生,仲有好多人聽廣東歌,而且唔一定淨係聽新興嘅Mirror、林家謙嗰啲,反而鍾意聽返同劉穎匡同期嘅陳奕迅、容祖兒,甚至係張國榮同譚詠麟。佢認為,文化同身份認同就係咁樣一代一代傳承落去,所以可能都應該生仔,將我哋所認識嘅香港傳比下一代去延續。

如果想睇全文嘅話,click入去劉穎匡Patreon,呢篇《荔枝角廣東歌排行榜🏆上線啦🎉》係開放大家閱讀,鍾意嘅話可以訂閱呀:

https://www.patreon.com/posts/li-zhi-jiao-dong-57189731