以前我係唔明白：點解啲社區活動咁鍾意食字？

成功嘅例子有「ｘｘ『走塑』大行動」，「走塑」一詞搞笑與意義兼備，近年廣為機構採用；其次烹飪比賽都叫「煮意」，也無不可。落到十八區，喺葵青就叫「『葵』手共創ｘｘｘ」，銅鑼灣叫「銅心ｘｘｘ」，屯門就叫「『屯』結ｘｘｘ」，呢啲地區例子都唔少。

喺近日連登嘅「第一屆地獄meme大賽」，就俾我見到啲更「勁揪」嘅例子：「聚首一唐——唐氏綜合症服務計劃」、「聾的傳人——聾人子女服務計劃」。「聾的傳人」意思貼切就貼切，不過會唔會有啲諷刺意思呢？或者係教聾人子女去勇敢擁抱呢個身分認同，呢個搞手先知。

 

直至上年我參與申請撥款計劃嘅過程，我先明白社福界喺食字方面係有莫大苦衷。根據一個社福界前輩撰文分享，通常撰寫十份計劃書，只有一份過五關斬六將，最終獲批撥款。一項基金預十個團體參與，分分鐘可以收到過百份嘅計劃書。委員未必能夠份份都細閱，呢個時候，一個可以突圍而出嘅標題就變得好緊要。

於是，一個計劃，時間、地點、人物、贊助機構、服務過程、內容特色，全部都變成標題黨「食字」要素。如果可以「化用成語」，更加典雅，個活動當堂好似有晒深度咁。一個名已經畀到評審委員咁多想像，「唔買都嚟睇下啦」。

公道啲咁講，件事都唔係得個「錢」字嘅。好嘅食字可以俾市民一個好好嘅想像，吸引佢哋報名參加。當然，唔可以「有頭威，冇尾勢」，個活動都要咁上下有趣，先對得起個咁Fun嘅標題。

環顧兩岸四地嘅活動標題，香港啲活動名都算嚟得簡潔、扼要、有趣。畢竟，靠個名去搏得青睞，都係光明正大嘅手段，總好過要靠關係、靠紅包啦。隨住大灣區「語言融合」，到底呢種食字標題，甚或好多特色廣東話嘅文化可以流傳幾耐，令人擔憂。呢樣真係靠大家各自修行喇。

#社區活動 #標題黨 #食字 #廣東話 #廣東話文化 #陳樂行 #港語學