傳美國中情局高調招募特工要求識廣東話 解放軍報呼籲捉間諜:「要打人民戰爭!」

解放軍報最近放風話,美國中情局(CIA)招募緊識各種中國地方語言包括廣東話嘅特工滲透中國,呼籲中國老百姓打一場反間防諜嘅「人民戰爭」。

中國軍媒「解放軍報」官方微博帳號「鈞正平工作室」,日前出post話美國中央情報告成立咗個「中國任務中心」(China mission center),目的係為「應對中華人民共和國帶來的全球挑戰,這項挑戰廣泛影響到本局的所有任務領域」,同時擴大招募懂得中文與中國各地方言嘅員工,又話中情局官網列出咗「中國地方話」,其中包括北京話、粵語、上海話、閩北話、閩南話、湘話、贛語、客家話、蒙古語、廣西壯語、藏語、維吾爾語。

報道「引述」美國中央情報局局長伯恩斯表示,佢將會成立「中國任務中心」,專收有關中國嘅情報。「分析」指出,中情局噉樣運作,係為咗配合美國國家安全戰略重點嘅轉移同調整,亦希望能夠對北京有更強嘅監視能力。

文章又話「如此明目張膽大肆招攬特工的美國情報部門,背地裡必然有著更多險惡與不堪手段」,「維護國家安全,我們唯有相信人民、依靠人民」,其中包括有「朝陽大媽」、「撈銅漁民」,要求動員全國人民「打一場反間防諜的『人民戰爭』,才能讓間諜寸步難行,無所遁形! 」

呢個話題喺大陸社交媒體廣泛流傳,點擊量超過3億。中國網民有啲都十分憤慨美帝亡我之心不死,有啲就講笑話:「我會東北話,你們不招嗎?小心我告你們地域歧視!快聯繫我!」

港語學用英文搵過「中情局高調招聘廣告」同中情局局長有關言論,一直未有著落。如有發現,即inbox本專頁賜教。

#解放軍報 #中情局 #特工 #大內密探 #國產凌凌漆 #中國任務中心 #廣東話 #普通話 #上海話 #客家話 #港語學

0 0 votes
Article Rating