鄧炳強:「廣東話講唔正會俾人打」 會研究法例處理新出現場景

噚日特首林鄭月娥、保安局局長鄧炳強及前立法會主席曾鈺成出席《政治新形勢》論壇。被問到23條立法,鄧炳強話,目前社會環境同2003年有好大分別,例如「廣東話講唔正會俾人打」,所以廿三條立法要因時制宜,應付國家安全威脅。

鄧炳強話:「廣東話講唔正會俾人打,唔同意見會俾人打,同埋亦都睇到好多外部勢力嘅情況發生。我諗大家都睇得好清楚。制定呢條法例唔係完成責任就算,我哋立法必須要應付到過去發生嘅事情,於是2019年以來發生過啲咩事,每一個場景我哋都要詳細研究,究竟當時發生嘅事情,我哋現在嘅法例有沒有辦法處理,若處理唔到,係咪需要處理呢,如果處理應該如何處理。」

港語學翻查法庭紀錄同傳媒報道,未搵到廣東話講唔正而俾人打嘅任何事件紀錄。不過,現時香港法例已經有襲擊及普通襲擊罪,傷害人身嘅行為都已經屬於刑事罪行。

相反,喺語言歧視方面,因應浸會大學要求學生普通話發音標準方可畢業,有人曾經向平機會投訴要求處理,但至今浸大嘅政策仍然無任何改變。

#鄧炳強 #廣東話 #假新聞 #政治新形勢 #林鄭月娥 #曾鈺成 #23條 #23條立法 #國家安全 #國安法 #講唔正 #2019年 #反送中 #反修例 #浸會大學 #語言歧視 #普通話畢業要求