睇《十年》反《十年》? 梁美芬曾讚「拍得唔錯」 憂母語消失反對普教中

噚日立法會後最後一次大會,用45分鐘三讀通過咗審議《2021 年電影檢查(修訂)條例草案》,禁止電影危害國安。梁美芬發言時承認,2016 年曾經入場睇電影《十年》,驚訝咁發現電影「煽動港獨」、「仇中」、「美化自焚」,但政府當時卻坐視不理,「當年有 3 歲細路入場睇《十年》,所以點解 2019 年會有 11、12 歲出去(參與社會運動)」。佢形容,已失去了數代年輕人,希望修例唔好再出現《十年》呢種「荼毒年輕人」嘅電影。

不過睇返以前嘅報道,梁美芬當年唔止係「了解下年輕人」咁簡單,都對電影內容有所共鳴,大讚「拍得唔錯」。佢自言鍾意<方言>一章講廣東話日漸消失嘅故事,強調自己都好反對用普通話教中文,又話廣東話、英文雙語教學,都無阻學生對香港有感情。

《2021 年電檢條例修訂草案》內容主要包括,要求電檢處檢查員未來須考慮影片上映會否不利於國家安全,並可延長至 28 天時間,以充份考慮及索取資料;政務司司長如認為影片不利國安,也可撤銷以往片發出嘅核准或豁免上映嘅證明書;督察可以喺法庭手令授權嘅情況下進入和搜查任何地方,並可要求核准或豁免證明書持有人提供上映嘅日期、時間和地點,以避免有人利用社交媒體或即時通訊程式隱藏違法放映影片。如未獲豁免或核准嘅影片,修訂亦提高最高刑罰至監禁三年、罰款100萬元。

#國安法 #電檢條例 #梁美芬 #廣東話 #香港電影 #十年 #香港十年 #電影審查 #藝術審查 #國家安全 #普教中

0 0 votes
Article Rating