郭富城堅持同囡囡講廣東話:「畀佢聽下廣東歌, 希望佢有一口流利嘅廣東話!」

天王郭富城早前以型格西裝造型現身尖沙咀出席銀行活動,噚日(26日)係城城嘅56歲生日,佢就話同家人簡單食飯慶祝已經好開心,問到有咩禮物收,仲曬命話「佢哋送咗Kiss畀我」。講到兩位千金囡囡時,城城就透露佢哋學緊芭蕾舞,老師讚佢好有節拍感、音樂感,「仲識做《唱這歌》個動作,影晒相Send畀我睇,開心到震。」

城城指囡囡會聽自己嘅歌,亦都會跟她們一同跳舞:「有時欣賞佢跳,我播歌佢就會自動創作,好多古靈精怪動作,好活躍跳唔停。」佢又話而家囡囡主要同人講普通話,不過自己會堅持與她們以廣東話交流:「畀佢聽下廣東歌,希望佢有一口流利嘅廣東話。」郭富城太太方媛係大陸女Model,因此曾被網民取笑做「國貨城」。之前佢特登請老師喺屋企教太太方媛同兩個囡囡廣東話同埋英文,培養佢哋嘅語文能力,因為成家淨係得佢識得講廣東話。

方媛自結婚之後,亦都的起心肝學廣東話。曾經喺社交網上傳一堆書本嘅相,其中包括「粵語教程」、「粵語速成初級教材」、「初學廣東話」以及「圖解廣東話」等等,睇嚟為咗學好廣東話方媛都花盡心思。

郭富城自己則係好本土嘅香港人,細個喺筲箕灣土生土長,中小學都喺港島東讀書,喺九十年代起被譽為廣東歌嘅「四大天王」,掀起「勁歌熱舞」嘅潮流。
#郭富城 #廣東話 #廣東歌 #方媛 #學廣東話 #港語學
4.7 3 votes
Article Rating