全國政協委員張志剛喺報章撰文推算，今次選舉地區直選投票率只會有兩成幾；咁啱前區議員李文浩發表問卷調查結果顯示，問到會唔會喺嚟緊立法會選舉投票，近八成會選擇「不投票」，多過話「投廢票」、「投白票」，顯示無論建制派抑或民主陣營，都係估今次嘅投票率會比較低。

身兼一國兩制研究中心總裁張志剛喺文章話，佢透露，研究隊伍用唔同模式、資料同數據去預測投票率，估算地區直選投票率只會喺三成以下，係20%多一啲或者接近30%。不過，佢就冇透露結果係點計出嚟。

前深水埗區議員李文浩就做咗個網上問卷，獲630個回應，俾人揀「不投票」，抑或選擇「投廢票／白票」，結果就有79.2%揀唔投票。呢個結果同建制派估計嘅民主派人士唔參與，以致低投票率嘅睇法都好接近。

李文浩認為結果顯示「大家嘅意向都係傾向杯葛選舉。」張志剛就話：「投票率的高與低，就不會影響到愛國愛港陣營的選舉結果，所以投票率高與低，就變成純粹的學術討論，又或者茶餘飯後的八八卦卦而已！」

記者：S Chung