講唔好普通話就掌嘴 四川6歲妹妹崩潰爆喊 大陸網民廣傳兼嘲笑:「口音真是太好笑!」

中國四川宜賓市一個6歲小妹妹崩潰爆喊嘅片段喺大陸廣傳。片段中小妹妹練習講普通話但講得唔標準,因此自責流淚,仲坦言係因為「害怕讀錯了會打嘴巴」。妹妹嘅阿姨受訪表示,佢練咗100次都仲係有口音,「覺得自己很笨」,就自責崩潰。

呢段片好快就變咗網上熱門,仲成為各地新聞。大陸網民普遍係當笑話咁去傳播,嘲笑四川人普通話即所謂「川普」好難聽,點聽都聽唔明。有來自重慶嘅華人就話,好多朋友睇到條片好嬲,因為佢哋講嘅巴蜀話係身分認同,而家就俾人打壓、污名化。

大陸近期力谷各市人民使用普通話,唔單止要人識得講,仲規定要喺唔同場合講,又要用北京口音作標準。四川省政府今年9月13日就發布咗通知,要求「各級黨政機關、事業單位公務人員在公務場合,必須使用普通話。」

喺香港,體罰兒童包括掌摑屬於刑事罪行。根據《侵害人身罪條例》,如故意襲擊或虐待兒童,導致該兒童受到不必要嘅苦楚或健康損害,即屬違法,一經定罪,最高可被判處監禁10年。

#普通話 #體罰 #掌嘴 #四川 #四川普通話 #大陸網民 #標準普通話 #普通話教育 #四川口音 #虐待兒童 #兒童權利 #港語學