曾眾籌逾40萬 粵語文學期刊遲遲唔寄書又唔回應讀者 KOL聲討 《迴響》先至致歉:「重大人事變動 人手嚴重不足」

粵語文學期刊《迴響》喺上年6月發起眾籌,喺逾2,000人支持下成功籌得逾40萬港元,並開始每月發行出版。今年9月,《迴響》聲明話由於人事變動,「9月號」須延期「一至兩星期」推出。但到咗噚日(17號),好多網民仍然留意話未收到期刊,引來多個網絡意見領袖追討。《迴響》終於回應話,「人手仲係嚴重不足」,為造成不便致歉。

噚日電台主持健吾出post話,留意到《迴響》嘅讀者由9月起收唔到書刊,紛紛留言追討,但至今11月仍然音訊全無,擔心編輯嘅安危,因此出post詢問。迴響迅速貼圖回應,佢哋話因為「重大嘅人事變動」導致延期,而且因為「人手仲係嚴重不足」,未能即時回覆讀者,不過「唔使擔心,你畀咗幾多期嘅錢就會收到幾多期嘅書」。

但係讀者似乎對解釋並唔收貨。有讀者指,3月訂咗件《迴響》Hoodie,至今仍未收到;有人質疑「十五期出咗點解冇出post嘅?」;有人話畀咗錢之後無法登入網上訂閱系統;更加有讀者直言編輯無恥:「你都好意思架喎, Pm 你唔理 ,email你唔覆, KOL出個post就出個咁嘅聲明!」編輯(掛名)擇言只係轉發帖文話:「大家都用唔同嘅方式支持呢本雜誌,真係好感恩。」

 


《迴響》講嘅重大人事變動,應該係8月尾鍾卓玲離任迴響。佢喺離任聲明坦言:「仍然好喜歡粵文,亦好喜歡呢本雜誌,無奈喺處事手法同期望上,未能同總編輯保持一致,所以呢個安排,相信對我本人、大家以及期刊都係最好嘅做法。」

當初《迴響》出版嗰時,除咗資金充足,亦都獲傳媒界廣泛訪問支持。著名專欄作家馮睎乾、盧覓雪都曾經供稿,撐粵語團體港語學都曾經協助推廣,出錢支持。出道之際,《迴響》人氣一時無兩。

不過,編輯團隊嘅態度亦都惹人非議。當時嘅總編輯「山城豬伯」喺訪問嘅話,「有啲人搞文學雜誌當推廣文學,但係我自己真係想當一盤生意咁run。」又開名話本地作家藍橘子放棄寫小說嘅粵語版本,須藍橘子開聲澄清話,佢嘅小說仍然堅持出粵語版本後,總編輯先至收回言論。

迴響一開始嘅編輯團隊有山城豬伯、葵倩鈴、阿擇(筆名擇言)、關煜星及鍾卓玲。至今只剩返編輯關煜星同編輯(掛名)擇言。雖然外間時有誤會,但其實《迴響》由出版到運作至今,除咗曾經捐款及宣傳支持,佢嘅運作都同港語學無關。

#廣東話 #廣東話文學 #粵語 #粵語文學 #迴響 #眾籌 #粵語文學期刊 #粵語 #廣東話 #本土 #本地 #本地創作 #香港人 #香港文化  #粵刊 #港語學