龍翔官立中學將與九龍工業學校合併 教育局:九工校舍寬敞 能容龍官學生

教育局今日(23號)宣布,龍翔官立中學將會喺2022/23學年,即係下個學年起同九龍工業學校合併。

教育局發言人承認中學適齡人口下降,黃大仙區剩咗較多學位。佢又話作為官立學校嘅辦學團體,政府資源運用等因素後,決定合併龍翔官立中學與九龍工業學校。佢哋仲講:「九龍工業學校及龍翔官立中學的前身均為工業中學,背景相近,而九龍工業學校校舍空間寬敞,能容納龍翔官立中學的轉校生。兩校合併不但有助紓緩黃大仙區學額供過於求的情況,亦可整合兩校資源,為學生提供更合適的學習環境及豐富的學習經歷,包括更寬廣而均衡的高中課程,以滿足學生的不同學習和發展需要。」

咁所以龍翔官立中學下學年起會停辦中一同中四班級,24/25學年就完全停止營辦。而家讀緊中四至中六級嘅學生會喺原校讀埋高中課程,但而家嘅中一至中三級就會喺中四轉讀九龍工業學校。

為咗令到合併更順利,兩校會喺今年開始舉辦唔同類型嘅師生交流活動、聯校課程同比賽等。教育局期望有關合併可以起牽頭作用,供其他辦學團體參考,鼓勵業界及早規劃,「務求在確保學校體系嘅整體持續發展和善用資源嘅前提下,保持整體教育質素。」

香港再現移民潮,早前直資中學校長喺電台節目表示,收到50多名學生退學申請,擔心學生退學潮會致殺校問題,又預言「黃大仙區和南區較危險」,因為黃大仙為「傳統殺校區」,而南區或因交通方便,改到中西區學校,而令原區學童流失。

#教育局 #龍翔官立中學 #九龍工業學校 #九工 #龍官 #殺校 #中學 #中學生 #香港教育 #廣東話 #港語學