教育局提供教材悼念南京大屠殺 小學生睇片嚇到喊須情緒輔導

前個禮拜教育局出通告建議學校悼念南京大屠殺,唔少學校批評教育局通知太急,難以準備課堂,因此好多學校都惟有用教育局提供嘅教材同課堂計劃。不料,有學校提早進行悼念活動嘅時候,好多小朋友感動情緒不安,需要課後情緒輔導。

今日(11號)網絡流出一幅保良局香港道教聯合會圓玄小學嘅通告,德育及公民教育組指,學校用咗教育局提供嘅教材,不料小朋友課後感到不安。據了解,教材包括南京大屠殺影片,內有講述血腥及暴力情節,對小一級別嘅學生尤其有影響。

關注教育議題嘅facebook專頁「豬心記者 Read write and seek」透露,德育科教師周四播放長約5分鐘的「南京大屠殺」短片,影片包含真實嘅戰爭場面,如日軍處決百姓、嬰幼兒屍橫遍野嘅畫面,有學生觀看時受驚嚎哭。小一生家長質疑:「為甚麼不調整,揀適合他們年齡的內容?」

學校承諾會加倍留意,因應級別調整教材,亦表示為小朋友感到不安而痛心,會為有需要學生提供情緒輔導。學校亦都要喺星期一返學嘅特別班主任節時段,疏導小朋友嘅情緒。

教育局前個禮拜通告全港中小學,建議學校響應「南京大屠殺死難者國家公祭日」,舉行40分鐘悼念活動,培養學生嘅國民身份認同。教育局提供活動建議、歷史專題簡報。

詳細報道:https://www.patreon.com/posts/59779080

#教育局 #南京大屠殺 #愛國教育 #香港教育 #小學生 #情緒輔導 #圓玄小學 #德育及公民教育 #港語學