《梅豔芳》呢套戲唔止喺兩岸賣座，喺新加坡都好收得，但只係可以播華語（普通話）版。有新加坡人喺上個月發起請願，希望戲院可以上映原版廣東話嘅梅豔芳，至今獲超過二千人響應。但近日新加坡資訊通信媒體發展局（IMDA）喺《新明日報》回覆指，「為配合政府的講華語運動」，一般版本場所要播華語版《梅豔芳》。

IMDA解釋話，佢可以「對可在不同媒體平台上使用方言內容量採取區別的方法」，具體取決於覆蓋範圍，即係話廣東話原版，可以喺觀看人數較少嘅「電影節」放映；但一般普及大眾、商業性質嘅地方，即係商業戲院，就要以華語配音版本放映。佢又指，電影發行商已經將電影華語配音版本交咗畀IMDA分級。

IMDA又話，了解讀者放映粵語原音嘅興趣，並且很難買到新加坡華語電影節《梅豔芳》原音版嘅戲飛。當局叫讀者問下主辦單位，睇下會唔會喺之後嘅電影節中放映呢條片。此外，片商都可以通過其他途徑（例如DVD / 藍光和網上隨選服務）向有興趣嘅觀眾提供原音版本。

之前新加坡人嘅請願聯署提到，因為疫情，戲院好少有得買飛，新加坡人又冇得去鄰國睇戲，佢希望 IMDA 同電影代理可以額外加映粵語場。聯署又提到女主角王丹妮都努力練習去模仿梅姐嘅口音，如果就咁配成華語，電影頓失光彩。有歌迷都話，梅姐成世都講廣東話，但華語版聽一陣梅姐嘅廣東歌，又聽一陣華語對白，感覺好唔真實。

資訊、通訊及媒體發展管理局（ IMDA ）係新加坡政府法定機構，隸屬於通訊及新聞部（MCI）。根據新加坡法例，只要任何人懷疑發行未經國家批准嘅電影被，IMDA可以進入同檢查居所。

講華語運動係1979年由新加坡總理李光耀發起的語言推廣運動，講華語運動主要是希望「推動華人懂說華語」，當年嘅口號係「多講華語，少說方言」。

#廣東話 #梅豔芳 #新加坡 #IMDA #新加坡電影 #講華語運動 #王丹妮 #新加坡華語電影節 #打壓方言 #撐粵語 #港語學