前線老師:莫怪教師播南京大屠殺條片唔專業 一切都係由上而下壓落|陳路易

南京大屠殺條片唔播?
你又點知楊局長幾時會突然興致起,開個記者大會,又掟啲金句出嚟,話「身為中共國人,要記實南京大屠殺,要仇恨日本,唔准學生繼續食壽司食拉麵睇拉打,唔睇只有弊沒有利?」
你又點知佢唔會講話,「教局已提供教師教材及備課錦囊,明顯地,呢啲教師未有小心、認真、詳細閱讀及理解相關教材及資料,亦沒有嚴肅準備課件的講稿內容。對於呢啲老師未有認真備課,只憑自己個人輕率的、甚至完全無稽的想法來教導學生,唔畀佢哋見識南京大屠殺嘅紀錄片段,確實是嚴重的專業過失,敷衍塞責,學校唔單止要作出相應的懲處,教局更會取消呢啲教師嘅註冊?」
你又點知楊局長唔會係記招度講,「呢啲唔肯畀學生睇南京大屠殺片段嘅教師,都涉及教學專業上的嚴重錯誤,反映呢啲教師完全沒有教授學生的基本能力,亦沒有應有的態度擔任教師,只憑個人想像教授,嚴重損害學生的學習和發展,教育局不能把學生交給這樣的教師,相信家長及社會也會贊同?」
教師唔專業就梗㗎喇。喺呢個時勢,一切都係由上而下壓落嚟,唔做就話學解放軍咁向你叫「後果自負」,梗係要做到足,其實家長有咩投訴,個槍口唔該直接向返教局。
作者陳路易係香港學校前線老師