受Black Lives Matter運動影響 88年歷史「黑人牙膏」改名為「好來牙膏」

美國黑人人權運動Black Lives Matter影響持續,亦都改變咗亞洲地區嘅文化。有88年歷史嘅黑人牙膏噚日(14號)宣布,將會改名為「好來牙膏」,港澳市場嘅品牌宣傳會寫「DARLIE 好來」,但本來設計嘅紳士頭像同色調則維持不變。上年6月黑人運動嘅高潮,高露潔宣布會重新評估旗下中國市場牙膏品牌「黑人牙膏」,成為美國反種族歧視抗議活動中受影響嘅品牌之一。

1958年6月13日,喺臺灣民聲日報刊登廣告嘅黑人牙膏。

好來集團表示,品牌採用公司始創名字「好來」代替「黑人」字眼,因為「好來」兩字象徵「美好因笑容而來」,致力令全球更多人綻放笑容;又話佢哋積極擴展亞洲以及其他市場,全新嘅中文名字將進一步提升品牌吸引力。嚟緊標誌上嘅字型會採用擬人化設計,更具親和力。

黑人牙膏喺1933年嘅上海,由嚴柏林同嚴中立兩兄弟創立,當時兩兄弟創立嘅好來藥物(好來化工嘅前身),將以前做嘢嗰間中國化學工業社嘅白玉牙膏配方改變,調出留蘭香味嘅黑人牙膏。牙膏取名做「黑人」,就係特登拎黑人面黑齒白嘅意思;有指佢哋曾經喺廣告話配方中含有非洲奇樹嘅潔齒藥物,嗰種非洲樹係令黑人牙齒特別白嘅原因。

1949共產黨建立後,嚴家到香港定居,喺香港、台灣設廠生產黑人牙膏,而留在中國大陸嘅黑人牙膏一度改名做黑白牙膏,至到90年代先重返大陸。