加州大學提出取消廣東話課程 華僑提倡保衛海外粵語|謝嘉麒

作者:謝嘉麒,美國華僑,語言學者(作者博客

 

2021年已到達尾聲,過去呢一年除咗新冠疫情影響全世界人嘅日常生活之外,粵語學界亦都發生咗幾件令人震驚嘅事件。

 

响舊年美國史丹福大學 (Stanford University) 突然宣佈停教廣東話課程,令唯一一位教廣東話課程嘅張錫莉博士黯然離開大學。呢件事備受爭議,而史丹福大學取消廣東話班嘅呢個決定,令好多張老師嘅舊學生提出大學收回成命,响網上傳填表單目前已經得到幾千人簽署,足以見到張老師教嘅廣東話班有幾好

 

最近舊金山城市大學(CCSF)亦都宣佈裁員同停辦廣東話班,令到好多地道華僑學生大感失望,呢件事早前亦都响港語學報道過。有關呢啲拯救海外粵語嘅新聞,具體同詳細嘅資料可以响有關網頁上參考: https://www.savecantonese.org/ 响呢度筆者想以語言學者嘅身份,以我語言學嘅知識提出一啲對廣東話嘅見解,向網上讀者解釋點解我哋應該盡心盡力,保衛海外粵語。 廣東話,又即係粵語,係一個極不尋常嘅地方語言。

 

眾所周知,粵語係漢語七大方言之一,除咗係中國東南部廣東省嘅主要方言之外,廣東話响海外嘅華人圈子亦都大受歡迎,有成千上萬嘅廣東話使用人士。 响西方國家有咁多識講廣東話嘅人,主要因為有好多華人响北美定居,佢哋嘅家庭傳統主要講廣東話,而呢個傳統已經維持咗好幾代,响北美洲已經有第二同第三代以廣東話爲主嘅華僑,所以廣東話絕對可以稱得上係响西方落地生根嘅傳承語言(heritage language)。

 

對呢啲海外華僑嚟講,廣東話係同親戚長輩交流溝通嘅重要本錢,亦都係佢哋認識本身華人文化嘅必學元素,係同祖傳中華文化聯繫嘅唯一方法同路徑。廣東話响西方華僑心目中有相當大嘅地位同重要性,而保衛及支持海外粵語係我哋每個識講廣東話人士嘅重大義務。

 

筆者想提出嘅係廣東話同其他漢語方言唔同嘅地方就係廣東話响西方國家已經廣泛傳播,有好大嘅文化同歷史地位,尤其對海外華僑,廣東話係一種不可或缺嘅語言。 加州大學取消廣東話班,無疑係威脅响海外嘅華人文化。

 

筆者已經簽咗保衛海外粵語嘅網上表單,給予我精神同學術上嘅支持,希望大家亦都可以多多支持海外同胞,互相合力,齊齊保衛海外粵語!

0 0 votes
Article Rating