【造星IV】 TENGIE總決賽堅持唱作廣東歌 贏得全場掌聲喝采 感動承諾會創作更多廣東歌

ViuTV《全民造星IV總決賽》噚晚(25號)聖誕節喺九展舉行,20強參賽者分別使出渾身解數,爭奪冠軍。本身係鋼琴導師嘅參賽者Tengie(區廷筠),表演項目係自彈自唱由自己填詞嘅廣東話歌曲《緊》。表演之後,佢感謝媽媽一直嘅支持,並且透露佢只會唱作表演廣東話歌曲,「因為廣東話係我母語」一句,令全場報以掌聲喝采鼓勵,場面感人。

表演之中佢首先自憐嘅感情以鋼琴自彈自唱,然後翻身五光十色嘅燈光熱舞,全能多變嘅形象表演令人眼前一亮。表演過後,佢捉緊機會向媽媽真情告白:「幾年前,媽媽曾反對我做音樂,有一年時間不理睬我。但而家,佢好支持我,會將我所有的報導睇晒,多謝佢。」

主持人強尼問到點解會喺總決賽選擇唱自己創作嘅廣東歌,Tengie話,「其實我由一開始寫歌至今都淨係寫廣東話,因為廣東話係我母語,有好多內容我都係寫關於自己嘅感受,所以廣東話最能令我表達自己。」全場觀眾都為之觸動,以掌聲鼓勵,喝采支持。Tengie都承諾:「我繼續都會寫更多廣東話歌。」

不過Tengie嘅表演未能突圍而出,結果由一直都係大熱嘅邱彥筒(Marf)奪冠,亞季軍分別由沈貞巧(Gao)及許軼(Day)奪得。

雖然女團成員要在明年1月才有定案,不過三位都有心水隊友,Marf坦言想Ada、子涓、Tengie及CK可以加入女團:「佢哋係比較全能嘅人,CK同Tengie都識整歌,香港女團有原創歌嘅成份係一件好特別嘅事。」

#廣東歌 #廣東話 #母語 #全民造星IV #Tengie #區廷筠 #港語學

0 0 votes
Article Rating