Header Image

《日本蜜月遊》

同老公結咗婚都已經十九年,個仔都十六歲喇,終於都可以完到我地嘅蜜月夢!

今年呀仔學校攪咗個台灣遊學團,我老公話,我地可以襯呀仔遊學期間去吓旅行,咁就唔怕比人告獨留兒童在家!當年結完婚,錢都用得七七八八,邊度再有錢去旅行吖,再吓先啦,點知儲儲吓有咗!有咗蘇蝦,唔好話去旅行,就連星期日去商場行個街都煩,由蘇蝦變小朋友,由小朋友變年青人,將心機放晒喺個仔度!呀仔去台灣遊學,老公話不如我地去日本渡蜜月!

日本,當年我未嫁嘅時候同老豆媽咪去過,不過都係好耐之前喇,起碼廿幾年前嘅事!我地諗下去日本邊度好,而家度度都好多遊客,聽啲朋友講,東京撞口撞面都係講普通話,大阪左穿右插都係講廣東話,終於老公話去京都。京都唔係冇遊客,只不過比起東京大阪少咁啲,我地仲要去京都周邊地方,唔係咩大景點,只係自己買張鐵路飛,仲要係無限次搭果種,我地站站落,行個圈,有感覺就行入啲,冇乜特別就上返車去第二個站,咁樣玩都幾特別,我地冇買旅遊書,冇睇有咩食肆好介紹,去到唔同國家,事但入一間舖頭,啲嘢食都係新嘗試!鄉郊地方,當地市民比較清純,日本人禮貌真係無得頂,特別上咗年紀嗰批,鞠躬鞠到我地都好唔好意思,買少少嘢都包到好靚,雖然好似好多包裝,不過包裝用品全部又可以環保回收,佢地公民教育真係好值得我地學習。

雖然話就話冇買旅遊書,不過遊客資訊就點都唔少得,日本既車站,往往都會有資料可以拎到,記得去到一個叫鞍馬地方,落車喺車站睇吓有冇啲有用資料,點知就比我地睇到可以去食流水素麵,當日冇乜遊客,只有一兩枱當地人,我地坐喺山邊,慢慢品嚐,品嚐素麵,品嚐環境,品嚐寧靜,有山有水有飲有食,仲要最愛人喺身邊,夫復何求!

京都好多神社,添添香油,拍拍手,鞠個躬,雖然我地去咗好多間神社,不過許下都係同一個願望,就係希望各個家人都身體健康!人大了,未算老,不過都唔後生,緊張唔係要咩大富大貴,只求身體健康,有健康身體先可以做到自己想做事,拖住愛人通山走,冇健康體魄點走?!

日本蜜月之旅玩咗五日四夜,同老公玩得好開心,好享受,呢篇遊記唔合格,因為都冇乜點寫我地遊過啲乜,反而抒發心情感覺仲多!只因為呢個係蜜月遊,同老公一齊,好老土咁講,其實去邊都一樣咁開心!

同呀仔喺台灣回程係同一日,我地仲可以喺香港機場相約接機!我們仨一齊返屋企,交換手信開心無比!

 

(文章為港語學第三屆廣東話徵文比賽參賽作品)