Header Image

《熱流涼風》

  日月交替﹐水流從不止息。止息唔記得﹐自已點黎依度﹐又點解係度。茫茫大海﹐止息只有身下依隻木船仔,任由水流引領,風向導航。

  夏日炎炎﹐汗水逐啲逐啲沾濕止息件杉,止息索性除佢落黎,赤身攤係度。船仔唔大唔細﹐岩岩夠一個人瞓低。係咁樣嘅天氣﹐止息最鍾意攤係度﹐等身上嘅熱力陰啲陰啲散落木面。晏晝個海係咁靜﹐眯埋雙眼,就得返水浪聲同自己嘅呼吸聲。止息聽住水浪點樣將佢帶到一個又一個地方。止息問過無數次﹐自己點解係度⋯⋯呢個旅程有冇結局,如果有﹐又係咪可以解釋到所有野⋯⋯從來都冇人俾到答案佢。

 

  「我想同你一齊﹐兩個人生活落去。」向止息提出嘅﹐係止息愛過嘅人。係漫長、見唔到盡頭嘅旅程﹐止息有過短暫、稱得上幸福嘅時光。止息曾經以為,只要自己唔放棄﹐兩個人就會有一個完整嘅結局。兩個人坐唔同嘅船﹐依然相遇、相愛,咁奇妙嘅緣分﹐又點會唔係命定嫁呢?引領佢地嘅水流係一致,照耀佢地嘅陽光係溫暖,撫摸佢地嘅風係帶甜。止息用衫上嘅布綁住對方嘅船﹐可惜個結無幾耐就鬆開。兩個人望住塊布跌落水面﹐然後慢慢、慢慢咁沉﹐最後消失係黑暗之中。

  有一晚﹐橫風橫雨﹐海浪失去規律咁﹐大大細細,左面冚一個﹐右面冚一個。好快﹐兩隻被海浪衝開。止息起勢咁扒⋯⋯博命咁扒⋯⋯希望戰勝強風大浪﹐返去愛人身邊,將瞬間變成永恆⋯⋯但佢點努力都阻止唔到,阻止唔到無情嘅大自然。雨停喇﹐係黑媽媽嘅海中心﹐得返止息一個。

 

  夏日炎炎最好眠。海面鋪左黃金咁﹐閃亮又耀眼。半夢半醒之間﹐止息諗起愛人﹐諗起千千萬萬同佢擦身而過嘅人⋯⋯佢識嘅人、佢唔識嘅人⋯⋯途經幾多山峰,越過幾多急流,周遭風景千變萬化﹐止息嘅旅程從冇停止。

 

  「你地會唔會覺得好孤獨?」好朋友曾經問。止息係旅程中遇過好多稱得上好朋友嘅人﹐水流將佢地聚集一齊﹐又係適當嘅時候將佢地分開。「我曾經以為﹐我係呢個世界最孤獨嘅人。我一直以為其他人都幸福快樂,只有我係大海漂浮﹐承受孤獨。直至遇到你地﹐成為朋友。透過你地﹐我先明白每個人都係孤獨咁流浪。諗到呢度﹐我就唔覺孤單⋯⋯什至有種感覺﹐每個活著嘅人都係我同伴。」止息有時會諗起朋友嘅呢番說話。

  止息係旅程中同唔少人結交﹐聽佢地分享故事。佢見過軟弱嘅人、自私嘅人、懶惰嘅人、殘忍嘅人,止息睇唔起呢啲人﹐不齒佢地嘅生活方式﹐什至憎恨佢地。如果一切都係水流嘅引領﹐而每個人都只係無奈又孤獨嘅流浪者﹐係咪意味住止息應該將呢啲人嘅醜惡歸因生命嘅流向﹐體諒佢地背負嘅孤獨?正如佢都想被人體諒,正如佢都想為自己嘅醜惡辯解。

 

  太陽帶住自身嘅光芒,埋落雲堆﹐最後係地平線上消失。止息坐起身﹐褸返件衫﹐享受日落帶黎嘅涼爽。逐漸明亮嘅星空下,止息同好多人一樣﹐繼續無盡嘅旅程。

 

(文章為港語學第三屆廣東話徵文比賽參賽作品)