Header Image

《櫻花中的蝴蝶》

唉!點算,真係好掛住、好掛住、好掛住(重要嘅野要講三次)櫻花飄落果一瞬間啊!

講到旅行,其實升左上小三之後就去少左好多,就算去,都係去澳門啊,內地啊,呢啲地方,都冇乜特別。但舊年去日本嘅一個旅行,唔單只帶比我視覺上嘅享受,仲為我上左人生中重要的一課。

其實成個旅行,我只係想講其中嘅一個景點~京都圓山公園。圓山公園係一個好出名睇櫻花嘅地方,當我隻腳踩入公園嘅個一刻,我罕有咁除低個耳機。放眼望去,成個公園地下都係櫻花,好似個海咁大,咁靚。我地係地上面鋪左塊野餐布,坐係上面望住粉紅色嘅仙子,慢慢咁從溫暖嘅家飛舞落黎,即使係我呢個跳舞專家,都睇唔清楚佢地跳緊芭蕾舞,定係拉丁舞,佢地跳舞嘅風格,琳琅滿目,花樣百出,睇得我眼花繚亂。

見到眼前呢一片充滿生機、生意勃然的土地,心入面,不知不覺又燃起左當初開始跳舞嘅初心,果陣時嘅我,咩都唔識,咩都唔想做。我感激當初推我入跳舞學會嘅老師,唔理我有幾反對,唔理我系咪咩都唔清楚,佢都願意一步一步咁耐心教我。就系因為咁,我從一個每次跳起身都會跌低嘅女仔,脫胎換骨,技術急速進步,瞬間變成一隻新蝴蝶,成為校際舞蹈比賽中嘅冠軍。可惜,時間飛逝,因為趕唔上學業進度,媽咪就暫停左我系舞蹈界嘅發展。你問我想唔想停?我自己都唔知。只系知道,呢一隻新蝴蝶引領緊我去新嘅地方,闖出一片新嘅天地。

幻想左一陣,又同屋企人傾左一陣計,好快就已經到左夜晚。抬頭望上天空,星星同月亮互相映照,襯托住黑夜下的聖誕樹’。我地坐系地上面,仰望住呢一片咁靚嘅天空,享受住鬧市中嘅一刻恬靜。果一刻,我真系好想問自己:究竟放棄左跳舞之後,我有冇再好似而家咁,清空一切想法,自由自在咁飛舞系專屬自己嘅花叢?而系現實中,放低一切顧慮,重拾起自己嘅興趣,飛舞出自己精彩人生,究竟有冇可能?

 

(文章為港語學第三屆廣東話徵文比賽參賽作品)