Header Image

《日本迷路日記》

 經過一晚充裕嘅休息,我同屋企人充滿期待咁開始第二日嘅旅程。

食完早餐之後,我地搭火車去充滿好靚嘅風景嘅豪斯登堡。喺搭火車嘅途中,我地食左好有日本特色嘅便當。裏面有好多好野食,例如:天婦羅、玉子蛋等等,佢地全部都好好味。

 到達豪斯登堡之後,我地先發現到原來我地頭先搭嘅火車係豪斯登堡特別號,外形非常靚,所以我地就沖左過去不斷咁影相。入左場之後,首先迎接我地嘅係一堆鬱金香。佢地有唔同嘅顏色,例如有黃色,橙色,紅色等等,但係最令我驚訝嘅係竟然有非常夢幻嘅紫色,見到嘅時候真係呆左。喺隔離,仲有唔同嘅風車。我最鐘意就係一個充滿荷蘭特色嘅風車,佢嘅外墻被人油滿左好多有荷蘭代表性嘅野,例如,傳統嘅荷蘭服飾,荷蘭木鞋,仲有我最鐘意食嘅芝士,全部都喺外墻到,真係有一刻想摘佢地落嚟食。喺豪斯登堡度過左成個上午之後,我地就準備搭車出返去城市,繼續我地一日嘅行程。

 正當我地去到車站嘅時候,先發現原來架列車已經到左,爹地,媽咪同阿妹就急急腳咁上左車,留低我一個人帶住迷茫嘅心情,呆呆咁企左喺車站到,望住逐漸開遠嘅列車。突然衫袋一震,將手機拿出嚟,先知原來係爹地打嚟,猶豫左一陣究竟接唔接電話,最後都係撖左“接通”。以為迎嚟嘅會係爹地嘅破口大罵,點知係佢溫柔嘅聲音,問我“係唔係冇上車?”我同佢講“係啊。我不如買飛搭下一班車” “好啦,小心d啦,有事打比我。。。嘟嘟嘟” 伴隨收線聲,我就要面對一個最大嘅難題,去買飛。我戰戰兢兢咁去到售票處,用英文同一個職員講,“唔好意思,唔該想買張由豪斯登堡去到博多嘅列車” “好啊,多謝你¥1110” 我揾一揾袋裏面嘅銀包,發現原來我唔夠錢!我得張¥1000咋,於是我弱弱咁同佢講左句 “對唔住,我唔夠錢啊” 佢露出一個尷尬又不失禮貌嘅微笑,諗左一陣,同我講 “一係你叫爹地媽咪準備好¥100,落車個陣時揾一揾車長,之後比返錢佢” “好啊,真係超級感激你” 經過大概30分鐘,架列車終於嚟到,見到個個職員姐姐即刻從售票處沖到去列車嘅駕駛倉,同車長講左一段野之後,跑返過嚟同我講 “我已經幫你同車長講左啦,你一陣比返¥100就可以啦”  之後,我就上左列車,途中瞓左一陣,眼見仲有差唔多25分鐘就到,即刻打比爹地,叫佢嚟車站接我,仲有準備¥100,交代埋我喺邊個車廂之後,就欣賞下沿途嘅風景。差唔多半個鐘之後就到啦,我去通知左車長,叫佢嚟等一等我,一陣比返錢,佢就帶住微笑咁慢慢等我。將所有野搬左落車之後,就見到爹地係到比返¥100車長,同車長講左多謝,同佢道別之後,我地就返左酒店。

 喺e個旅程,我再次感受到日本人個種臨危不亂,又有禮貌嘅精神,真係好佩服佢地。e日結束之後,我就係到諗,如果我遇到嘅唔係日本人,件事會變左點呢?

 

(文章為港語學第三屆廣東話徵文比賽參賽作品)