Header Image

《遊記(講到睇紅葉你會諗到邊度呢)》

   講到睇紅葉你會諗到邊度呢? 日本? 加拿大? 定係比較近嘅,香港嘅元朗大棠呢? 原來除咗呢啲,香港有其他睇紅葉都好靚嘅地方㗎! 就例如青衣公園啦!

   上個週末,我同朋友去咗青衣公園野餐, 我嗰兩個朋友都係青衣長大嘅, 知道好多青衣嘅好去處, 就推介咗喺秋天嘅時候去青衣公園睇紅葉。 當時都好驚呀㗎,原來青衣都有紅葉睇嘅咩? 但去到先知原來唔單止有,而且仲非常之靚添!

  我嗰日孭住個背囊就搭車去青衣, 去到青衣公園,我比眼前嘅美景嚇到傻咗呀! 雖然青衣嘅紅葉數量冇元朗嗰邊咁多,但係配上嗰個人工湖就好似去到世外桃源咁樣。 我去到嘅時候我嗰兩個朋友都未到,於是我就係公園度自己行咗陣。 抬頭望望樹上嘅紅葉, 有紅嘅黃嘅橙嘅,顏色鮮豔到好似係花一樣。 而家正值深秋, 一陣陣嘅涼風迎面吹來。風一吹,樹上部分嘅紅葉跌咗落嚟,鋪滿整整一條路。 平靜的湖水就好似一面鏡咁樣, 倒映著啲紅葉,倒映著啲楓樹。 然而嗰啲倒影好真實, 彷彿分唔出到底邊一邊係真邊一邊係假。 漫步湖邊, 涼風伴著一片片嘅紅葉吹到我面前, 感覺好似置身於一幅相一樣咁靚, 好似只有童話故事先會出現嘅景色呈現於我眼前。

  又一陣風,將紅葉吹到湖面上。 片片嘅紅葉化作一隻又一隻鮮紅色嘅小舟, 喺水波粼粼嘅湖上漂浮著。  我嘅目光隨著小舟漂流嘅方向看去, 先驚覺原來湖嘅對面係一個亭。 但係lee個亭同平時見嗰啲古色古香嘅亭唔同,佢唔係中式嘅,而係採用咗紅磚瓦頂嘅歐陸式設計, 配上片片嘅紅葉,別有一番風味。红磚映襯住紅葉,完全冇撞色嘅感覺,反而十分匹配。唔知點解,我竟有個感覺嗰d红色小舟係有意將我嘅目光引領到lee 個特別嘅亭。定還是係d風將小舟駛向嗰個方向?我唔清楚。

   當我陶醉緊喺lee 一個美景嘅時候,有人拍咗我膊頭一下,將我由思緒中拉回現實。原來我兩個朋友嚟咗啦,我嘅紅葉之旅亦都告一段落。

  喺香港呢個石屎森林入面,邊個估到有一個人間仙境呢? 其實可能你身邊會有好多好靚嘅地方、景色,但係喺呢個咁煩囂嘅都市,邊個會停下腳步慢慢去欣賞? 都市人生活忙碌,平時很多都係匆匆忙忙咁走過,甚至係低頭望住自己嘅手機。 即使自己身邊有一啲好靚嘅景色都係走馬看花咁忽忽走過。 其實, 抬頭望一望四周,可能會發現到一啲平時忽略咗嘅小事物。 平曰不妨停下腳步,慢慢細心欣賞周圍嘅人同事,或者會有新嘅發現。

 

(文章為港語學第三屆廣東話徵文比賽參賽作品)