Header Image

《文件》

   望住枱頭嘅相,見到我同家人喺相中燦爛嘅笑容,令我不禁回想起今次郊遊遇到嘅件件趣事。郊遊完返嚟之後,我趁自己仲有記憶,即刻將今日所發生嘅事記喺日記裏面,記下呢一次難忘嘅郊遊……

   今次我哋去郊遊嘅地方,係西貢郊野公園,我哋一去到嘅時候,大家都已經好肚餓,所以即刻搵咗個地方,坐低咗,就「開餐」!

   我哋食食下嘢,發覺妹妹唔見咗,於是大家都驚惶失措咁分頭去搵妹妹。最先搵到妹妹嗰個係我,但係當我見到佢嘅時候,我冇伸出手去捉返佢返嚟,因為我見到嘅,係一個天真爛漫嘅小女孩興高采烈咁追一隻色彩斑斕嘅蝴蝶。

   我見到嗰個場景,都頓時心花怒放,放下一切嘅煩惱憂慮,同妹妹一齊追起蝴蝶上嚟,最後我哋又返到去我哋原本野餐嘅地方啦!

   之後我哋一家人成個下午,周圍行山玩水。玩到大家都攰啦,黃昏嘅時候, 我哋就返咗屋企,結束咗呢一日嘅郊遊。

   雖然今次嘅郊遊完咗,但係今次同妹妹一齊追蝴蝶嘅開心經歷,令我重拾兒時無憂無慮嘅回憶,明白到雖然我哋嘅生活非常繁忙,但係有時停一停,輕鬆一下,都係不可或缺㗎!

 

(文章為港語學第三屆廣東話徵文比賽參賽作品)