Header Image

《遊記(今次嘅旅行真係好正!)》

   今次嘅旅行真係好正!我呢世都唔會唔記得呢次嘅旅行。有幾正?依家話你知啦!

   今次暑假參加嘅旅行團雖然只得兩日一夜,但係就正過  其他旅行團,酒店正、野食正、挽嘅野正,最重要嘅係個温泉超正!

   八月二十五日,朝早八點,我同我嘅屋企人就已經喺深圳關口集合,原本以為呢啲時間係行車高峰期,肯定有排等啦,點知,唔使等好耐,已經有得上車喇,安排得認真唔差。

   跟住,我哋就上車,岀發去第一個景點—機動遊戲場,呢度啲機動遊戲仲多過香港嘅海洋公園,我第一時間就拉住我嘅屋企人去挽過山車,真係好刺激阿!首先直衝落去,跟住上山,再直衝,跟住嚟2個360度大迴轉,最後上多次山再直衝落去!真係好爽!除咗呢個之外,仲有好多香港冇嘅機動遊戲,我哋都走去仲一體驗一下。

   挽完之後,我哋就離開機動遊戲場,搭車去食午餐,我哋嘅午餐係自助火鍋,呢個旅行團嘅團費係250蚊一個人,本來以為都唔會有咩好食,點知,又岀乎意料地好喎,有羊又有豬,有蜆又有蠔,野飲任湛,雪糕任食,真係唔差。

   食飽之後,我哋就岀發,去酒店喇,挽?番酒店唔係應該休息架咩?咁你就錯喇,呢間唔係一般嘅酒店,佢係非一般嘅酒店,唔只有得休息,仲可以盡情享樂

   我哋大約四點鐘左右就到咗酒店大堂,四點十分左右就可以坐車去我哋住嗰度喇,你冇睇錯,的確係要坐車去,點解?因為呢間酒店係一間間嘅別墅屋,每得家庭都有一間。

   別墅屋非常大,有兩間睡房,一個大廳,有開放式廚房,而且有卡啦ok提供,又有電子麻雀,仲有埋後花園,後花園嗰度,仲有泳池,同温泉池,係私家架,我哋食完晚飯,就即刻去享受浸温泉嘅樂趣,真係好舒服阿!跟住我哋就挽屋入面嘅設施,挽到凌晨一點先肯訓。呢個旅行就因為呢個酒店生色不少,己經唔可以用一個正字嚟形容喇!

   到第二日,亦即係呢個行程嘅最後一日,離開酒店嘅時候我都好唔舍得,好想留喺度挽多幾日先走。呢個旅行真係好好挽,好開心,而且價錢唔貴,簡直係物超所值,相信冇其他旅行可以正得過佢架喇!

 

(文章為港語學第三屆廣東話徵文比賽參賽作品)