Header Image

《中文作文》

今年暑假,我跟合唱團去咗東歐表演。其中一站喺奧地利,我哋去奧地利逗留咗三日,嗰三日係成個旅程入面最好玩嘅,喺嗰度發生咗啲從來都冇諗過會發生嘅嘢。


第一日,到咗奧地利之後我哋就去咗入住嘅旅舍度check in。上到間房之後,我哋就放低曬我哋嘅行李,出發去食午餐 。我哋分組去搵嘢食,但係我哋嗰組就搵唔到有嘢食。當其他組已經食曬嗰陣,我哋仲喺度好努力咁搵緊啲個個都鐘意食嘅嘢。正喺呢個時候,自由時間得返15分鐘,我哋唯有求其搵個包食。冇辦法啦,鬼叫我哋全班都係路痴。


食完飯之後,我哋就去咗一個音樂博物館。個導遊話呢個博物館好出名,出名在佢呢個博物館係一個有互動性嘅博物館。遊客可以喺嗰度玩一啲音樂上嘅遊戲,行過條樓梯都會發出啲琴鍵聲。我哋喺個博物館度玩足3個鐘,最後仲喺紀念品店 買咗好多嘢先肯走。咁就過咗一日啦﹗


第二日,我哋去咗奧地利一個好出名嘅皇宮,皇宮入面擺出一啲好靚嘅裝飾品有花樽、油畫、吊燈,同埋好多好多唔同嘅西式裝飾,真係好靚ga﹗


參觀完呢個皇宮之後,我哋就去咗食午飯。之後就去咗一個老人村度為我哋嘅表演作準備。我哋先化妝換衫,再喺我哋嘅場地度做彩排。雖然唔係好多人嚟睇,不過我哋都好畀心機去做,希望嚟睇嘅人可以享受我哋嘅表演。結果佢哋睇完之後好大力咁拍手掌,令我哋好有成功感。表演之後我哋就去食晚餐,雖然個晚餐真係唔係咁好食,不過嗰日都好開心。


第三日,即係我哋留喺奧地利嘅最後一日,我哋去咗行街買嘢。去咗好多唔同嘅舖頭,買咗好多唔同有奧地利特色嘅嘢,有朱古力有糖乜都有。離開嗰陣我哋都好唔捨得奧地利,希望有機會可以再嚟啦!