記唔記得方大同嗰首〈愛愛愛〉，因為呢首歌，我愛上左方大同，同一時間亦不知不覺間愛上你。你話你好鍾意「你哭起來／我笑起來／都為了愛愛愛」 呢句歌詞，而我就話我愛嘅唔喺歌詞，而喺你成嗰人。
當時，作為學生既我，為左冧你，我死慳死抵買左呢隻碟比你。當時你開心左成晚。快樂點解可以咁簡單？
你嗰時仲講笑咁同我講入面有一首歌叫〈四人遊〉，話就算散左，都要做返朋友，我哋要好似四人遊咁「如果要一起去旅遊／去歐洲」。
零九年金融海嘯，我讀唔成書，又考唔到警察，去左做保安，而你入左大學，仲識左嗰有錢仔。我哋拍左三年話散就散。
喺呢嗰大染缸，你慢慢慢慢咁變緊，而我亦都好快有女朋友。
你話︰「去唔成歐洲，不如去長洲……」
我無諗過你真喺會記得。
我嗰時真喺天真到以為可以四人遊……
喺東堤租左間房，沿住海邊四個人一路行一路行，剩喺行個沙灘，你嗰位肥仔男友都喘曬氣。有好多次佢跟唔上，我哋兩嗰並排而行，我喺度諗︰如果喺平行時空，我哋會唔會仲喺埋一齊？
我問佢長洲有咩好食，佢竟然話第一次嚟。
佢話：「如果唔喺你，我都唔會有機會嚟。」
我都唔知佢真心定串緊我。
芒果燸米滋、長洲魚蛋、必食嘅炸魚蛋，你男朋友都話喺第一次食，好好食，但我見佢連問都無問過你食唔食。
我好識做咁餵我條女食，我見到你望著我。
行去張保仔洞，你男朋友話太熱要抖下，我帶著我女朋友同你一齊行。
我有一個童真嘅諗法。唔知當時海賊嘅藏寶地方，除左寶藏會唔會收埋尐女人呢？如果我喺佢，我會唔會可以擁有數之不盡嘅財富、權力同女人呢？但我其實只想得到你。
行入去開頭好涼爽，之後開始覺得好焗、好潮濕，你唔小心跣親，捉著我，我哋對望左一秒，但好快你就縮左手……嗰時我覺得你仲對我念念不忘。
行到出去，望著嗰海，我心諗︰如果搵到張保仔嘅寶藏、如果得到成嗰島，你會唔會返黎我身邊？
其實我都唔知道你男朋友有咩好？
兩日一夜，好快就過去。
返到中環，一架車，我開始感覺到有尐距離……
可能我對你念念不忘，我好快亦都同女朋友分開咗，妄想一日你會返嚟。
又三年，方大同由〈四人遊〉、唱到〈三人遊〉、之後〈二人遊〉。
你話大學畢業旅行，不如今次真喺去歐洲，不如三人遊，而我亦唔知點解你男朋友今次咁落力叫我去。
其實我只喺想同你去歐洲。
一一年依然有歐債危機，當時月入一萬既我真喺儲左四五嗰月，而你男朋友一句：我請寶寶你去，你垂手可得。
一落地，已經租左跑車、二個翻譯，一個中、一個英，住城堡。
城堡出面有嗰沙灘，你男朋友無啦啦話想同我行轉沙灘，佢話想比個畢業驚喜你，想叫我駛開你，佢話有要野準備。
我覺得同你有獨處機會，求之不得。我哋行左市集，我買左嗰音樂盒比你話慶祝你畢業，你仲話︰一路以嚟我都好重要。
最後，我哋三個去左潛水，潛到珊瑚旁有戒指。你男朋友喺潛水嘅時候為你戴上戒指，一上岸一隊樂隊祝福。
無論喺結婚定喺分開，香港人嘅愛情都喺紙紮嘅，用水一濕，一穿就破。就好似啱啱你話我好重要，下一秒就同人結婚。
你哭起來，但我無辦法再笑起來。
《三人遊》嗰句「有些話我選擇保持沉默／別把實話說破」直插我心。我在場都變得可有可無。今次旅行，你男朋友應該喺特登叫埋我去祝福你。
去完歐洲，我就真喺心死，無再聯絡。
我明白到成功需父幹呢嗰道理。
一八年中美貿易戰，香港經濟都喺未好過。我其實已經好上進，人工由初初八千五，加左一倍，變萬六。
今晚我幫人去山頂頂更。
太平山下無常事。世事就喺咁橋，我竟然喺巡邏嘅時候撞返你，旁邊多左一對孖生仔囡。呢度望到成嗰香港，我哋都喺站在同一空間，但有無同樣嘅情感？我有一刻想同你打招呼，但我無。
我心入面諗︰「唔通同你講︰不如今日都喺四人遊？」
「今次仲去唔去歐洲？定喺去呢個私人住宅嘅歐洲小花園？」
如果可以，我想再一次四人遊。當時如果我再努力一點，喺張保仔洞再捉實你隻手，會唔會唔同左？
生活總喺陰差陽差，就好似我話想做警察，但喺我唔夠叻做唔到，最後做左保安，用另一嗰方式去維護呢嗰世界嘅秩序。
或者今晚我應該作返首一人遊。
（文章為港語學第三屆廣東話徵文比賽參賽作品）