二零一八年七月二十九號係菜街行刑日，講出嚟真係失禮，十八年嚟我竟然未曾去過菜街，呢日一於大鄉里出城，去學吓人見證歷史。
菜街範圍唔大，同舊時大笪地無得比。一條直路，兩邊大廈林立，地下係舖頭。香港大把街道係咁嘅格局，若果講景，真係無嘢好講，但係其中嘅人物，就構成一道道奇趣風景，不可不記。
菜街人物，可以分為兩類。
第一類當然係表演單位。我由街頭行到街尾，一步一檔口，一檔一世界，大大話話都有幾十檔。呢啲檔口，大細不一，有啲只有幾個人身位，器材比較簡單，得一、兩個歌手。有啲佔地較大，又枱又櫈，既有打碟區，又有歌手休息區；唔只咁，仲有主持人介紹歌手，兼搞吓氣氛。規模有得咁上下，應該都幾受歡迎。
歌手以女人居多，以成熟型為主。有啲個款好親切，十足十你隔離左右啲師奶，只係比平時買餸、湊仔返學、放學講究啲，戴個閃閃令頭箍，著條去飲嘅裙，化下妝咁。有啲打扮得幾斯文大方，令人睇得好舒服。最突出嘅係啲造型誇張嘅歌手，各式假髮，性感衫褲，濃妝艷抹。佢哋表演駕輕就熟，大概係職業歌手。平時見區議員舉辦酒樓聯歡會，宣傳話有著名歌舞團演出，可能就係佢哋。
歌手唱嘅多數係舊歌，例如《相思淚》、《藍屏晚鐘》，真係合晒我合尺。有啲人唱得真係唔錯，我聽一個姐姐唱《相思淚》，咬字清晰，歌聲淒婉。佢眼神落寞，雨打楊柳，弱不禁風。我一路聽，一路感覺到有一絲一縷嘅哀怨微風，喺耳邊縈繞，冷冷清清，悽悽慘慘。唱《上海灘》位姐姐，聲底厚實，一字一句，如滔滔江水，滾滾巨浪，激起千重浪花，淘盡無數英雄。一曲唱完，令我心神蕩漾。歌手唱得投入，既係自娛，又可以感人。
當然，亦有所謂歌手，表現震撼過打八號風球。有一個姐姐，右手搦咪，左手舉高，成個自由神像咁。音樂響起，佢立刻啟動全身肌肉，原地上下係咁跳，迷你裙成個蓮蓬咁喺狂風中亂轉。佢似乎係唱廣東話歌，但又似普通話，總之就係唱到唔清唔楚。直情係枉死鬼搵包大人伸冤咁。有一類人但求自己開心，我有我天地，人家點睇，根本唔在乎。
菜街第二類人物係聽眾。
我逐檔望吓，每一檔都有人聽，爭在多定少啫。聽眾以中年人同上咗年紀嘅人居多。各人自動自覺以歌手為中心圍圈；有受歡迎嘅歌手，被兩重，甚至三重人圍住，你都咪話唔巴閉。聽眾中有真心聽歌嘅，一邊聽，一邊拍大脾打拍子，甚至跟住唱，極為陶醉。歌聲悠悠，時光倒流。後生仔女，拖住手去荔園，行兵頭花園。就算往事只能回味，亦係滋味無窮。
有熱情嘅歌迷，聞歌起舞。當中不乏舞林高手，恰恰、阿哥哥、牛仔舞，舞步嫻熟。當然，亦有舞林奇葩。有人張開雙手，學大鵬展翅，拍翼節奏有快有慢，翼下生風。有人表演貴妃醉酒，神態嫵媚，迷死霸王。有人走碎步，口中唸唸有詞，十足十喃嘸佬破地獄。唔欣賞呢班人嘅，覺得佢哋唔知醜；但諗深一層，人家自己開心，與你何干？捱咗幾十年，仔大女大，供完層樓，難得搵到心水消遣。再講，幾十歲仲郁得咁勁，其實應該戥佢開心。
有支持者為偶像助威，舉起寫上偶像個名嘅紙板揮舞；亦有人送花，或者同偶像合照。唔好笑人幾十歲先迷偶像，呢啲係精神寄託。點解後生仔女追星就無問題，但係年紀大就唔得？做人公道啲好。
一般聽眾都樂意打賞歌手，主動遞錢過去，仲握手或者撃掌。舊時街頭賣藝，收打賞慘過乞食，仲要隨時有流氓搗亂。呢度嘅聽眾識得尊重人，歌手成手銀紙，收入似乎唔錯，實在令我羨慕。
我睇吓睇吓，條街愈嚟愈多人，好似大浪湧埋身，打到我企唔穩咁滯。啲人逼到我成身汗，我好似跌咗落海。原來時辰快到，警察唔停口叫人走，偏偏啲人唔願走。檔口開大喇叭，人人擘盡喉嚨，連聽眾都唱埋一份，嘈到地震咁。有人迴光返照咁出盡力跳舞，跳到地層斷裂；有人摟埋一堆，喊到慘過梁天來。記者擧起攝影機係咁影，又訪問人。呢個就係歷史時刻。
十八春秋，菜街娛人，無數人喺度搵到樂園。菜街養人，藝人喺度得到身上衣裳口中食。菜街擾民，居民受盡噪音折磨，幾乎精神崩潰。殺街之後，恩怨情仇，俱往矣。
（文章為港語學第三屆廣東話徵文比賽參賽作品）