今日全力去位於荷蘭嘅高費呂韋國家公園內，一個叫庫勒穆勒博物館嘅梵高畫區。
呀！有好多梵高嘅作品！第一幅撼動我嘅係<盛開嘅桃樹,>，簡介話幅畫係獻畀已故嘅老師，原因係基於歡欣而唔係一啲嚴肅嘅話題。畫作富有生命力，喺側邊睇埋去會發現油彩好厚，整幅畫好立體。之後見到<有絲柏的道路>！其實我最鍾意梵高畫絲柏，好詭異，存在感好強，好似好赤裸咁觀察梵高。墨綠到黑嘅筆觸既短且粗，如火舌一樣步步進逼，每一劃都想要逃離畫紙，感覺好不安。但留意返夜空，一整片嘅藍讓人放鬆落嚟。黃色嘅線條慢慢有規律咁變成一個個漩渦同圓形，化為柔和嘅月光及星光，事實上狂亂嘅梵高心底都想得到平靜吧？而每當抬頭望向夜空，佢心情都會舒暢一啲嗎？另外亦欣賞到名畫<夜間咖啡館>及<向日葵>，一啲自畫像、人物畫、風景畫同靜物畫。梵高係一個好好學、好努力嘅人，佢視米勒為偶像，所以臨摹咗<播種者>好多次，收藏館內嘅係佢最鍾意嘅畫作。之後又睇到著名嘅<食薯者>，依幅有一個人背坐，另外有梵高練習5位主角嘅特寫，幾有趣。
庫勒慕勒仲收藏咗好多名畫，由印象派到當代嘅藝術品都有(再講我就露底牌)，亦有好多雕塑，所以吸引好多人參觀，甚至有日本嘅公公婆婆組團嚟睇。之後發現戶外有個雕塑公園，維基話庫勒慕勒想反映出有關藝術、建築與自然共生嘅理念，所以藝術品建築物同花草樹林融洽咁放埋一齊。雖然叫公園，但懷疑有成個銅鑼灣咁大，甚至更大，職員需要踩單車巡視，你就知成件事有幾嚴重。事前無做功課，所以只跟路標指示走，居然發現Jean Dubuffet嘅Jardin d’email，可惜維修緊。時間無多，職員開始提醒遊客離開，因為有野生動物嘅關係，你唔小心遺留喺度，就可能見唔到翌日嘅日出。當職員見到我稍稍唔係向出口前進，都會提醒我走錯方向，可能佢感覺到我仲想周圍去同亂闖長命樓梯。佢踩紅色單車，我行路，傾偈得知佢好鍾意自己份工，佢話可以喺一個咁靚咁有藝術氣息咁自然嘅環境下工作，令人心曠神怡，希望將來我都搵到一份好鍾意嘅工作。
佢成功護送我返出口之後，見天未黑，就踩園內提供嘅白色單車去買手信。喺一個抬頭只見到樹葉，向前望只有樹幹嘅森林踩咗9分鐘之後，終於去到望得返天空嘅遊客中心，但畀我發現隔離有個關於地質學同生物學嘅博物館。佢有一個特色，佢無砍咗棵大樹，畀棵樹貫穿建築物，完美表現出公園想自然與建築物共生嘅概念，亦有好多資料同動物標本，可惜夠鐘閉館，所以返去手信店。
買完手信，全部都係買畀自己，哈哈。見天未黑(依句熟口熟面)，就貪心去埋聖胡伯狩獵住宅，喺途中偶遇到一兩隻野生動物就更好。咁又開始踩單車，曾經有一段時間聞到好強烈嘅野獸氣味，但最後都緣慳一面。終於見到住宅了！住宅用料好樸實，但好有氣派，可能建築物嘅中間部分高咗出嚟吧。圍繞住宅走一圈，發現每個位置都有唔同嘅美景，正值黃昏，住宅有蔚藍漸變為橙紅色嘅天空做背景，有一大片森林包圍，屋前湖泊又映照返色彩鮮豔嘅夕陽，以及樹木翠綠嘅倒影。為仙境留下倩影，得返20分鐘趕去巴士站，但踩咗一陣單車，心諗咁遠望返去住宅會係咩光景呢？嘩，完全係一個世外桃源！掙扎咗一陣都係落車影低佢。
上返車又繼續快速死命踩單車，由森林踩到去沙丘(點解個變化會咁大)，個天由藍色慢慢變成紅色，沙丘嗰條路踩咗勁耐都仲係得沙丘，又要望住太陽，曬得好辛苦，但踩到個天變黑，又好難搵路。當自己嘅gps愈嚟愈近巴士站嘅時候，見到單車停車場，心入面忍唔住講粗口！咁快手泊好架車跑出去，但趕得切嘅機會真係好渺茫，不過都無完全放棄。跑咗分幾鐘，真係頂唔順，揹背囊又長褲長羽絨褸，可能有人見我跑緊，預計我趕時間，就有架私家車駛埋身邊，問坐唔坐順風車，雖然佢話可以送我去更遠嘅地方，但坐陌生人嘅車太耐不免有危險，就婉拒咗。好快就到巴士站，架巴士仲喺度，真係好感激佢，所以就算落咗車都向佢揮咗一陣手多謝佢幫忙。
因為咁，我就好順利咁坐車返去宿舍附近，仲有時間食餐好慰勞一下自己添，完。
（文章為港語學第三屆廣東話徵文比賽參賽作品）