阿爾巴尼亞，歐洲最窮嘅國家，當地人窮得嚟但又好和善。
呢個國家係我喺巴爾幹嘅第六站，由科索沃入首都地拉那。事前有晒心理準備，阿國交通係出名嘅，出名亂嘅。喺普里茲倫上咗架殘殘哋嘅錢七，東巴爾幹主要以呢類十幾座嘅小巴為交通工具。車身已經好火舞黃沙，好電影感。而避震同美食展個夾一樣，都係壞咗啊，扽足成程。司機自信手車辣過秋名山車神，掟彎掟到飄移咁，有幾次驚會飛落懸崖，心入面係咁叫媽媽咪呀。
坐車，係考驗大家信任嘅時刻。
幾個鐘嘅高山低谷之旅後，喺入城前嘅高速公路，架車停咗。啲人落晒車，我仲戇居居咁坐喺入面，以為係放風時間，直到司機同我講要轉車先知咩事。於是孭住大背囊，手攞行李袋，喺車來車往嘅馬路搭另一架小巴。
上到架車，嗚啊，真係喊三聲！烈日當空，陽光隔窗射入嚟，三十幾度嘅車廂，得車頂開咗細細嘅窗仔，其他就鎖死晒。一路體驗過山車嘅刺激，一路享受免費嘅桑拿，混雜絕望後便是「汗」水衍生出心碎，大汗耷細汗咁，呢啲咪叫青春囉。
入到城，用手機打開地圖睇。無論用咩程式，都睇到一個個巴士站嘅標誌圍滿成個城。密得好緊要，唔好講話主站，連市中心喺邊都見唔到。觀緊星嘅我，個刻諗起天王句「核心外圍係核心內圍」。
弱水三千，只取一瓢，喺茫茫嘅標誌中，架車終於停低咗喺地圖上冇顯示係巴士站嘅巴士站度。
地拉那嘅巴士站多到數唔晒，多數又冇巴士牌，停車憑感覺，城內城外跨國嘅巴士站各據一方。但當地人就認為好有系統：巴士只開單一方向嘅循環線，南面嘅站絕對唔會有車去東面。大巴行得好慢，入唔到窄街，好冇效率；反而小巴細，流動性高，上落客夠快，所以當地先會咁多。
有日去首都附近嘅克魯亞古城。上車坐低後，啲人係咁望住我，不過都慣晒，自科索沃起，東巴人對亞洲面孔相當好奇，有試過俾人當係明星咁要求合照。車上好多都係老人，只識阿國語言或者俄文，但又對我好好奇，於是有個後生仔幫手翻譯。佢哋啲問題多過施政報告答問大會，由去邊度旅行、來自邊度、幾歲到結咗婚未，沒有問不到，只有想不到，見工嘅面試官都冇問得咁多。
後生仔同我講自己喺意大利讀工程，畢業後喺個邊返工賺錢，放假返嚟探屋企人。阿國嘅青年就算喺當地讀書幾叻，揾嘅錢都唔多，上唔到位，筍工俾權貴霸晒。所以有機會去外國浸鹹水，就盡量喺當地揾工，改善生活。
聽到呢度，真係好想喊：香港，亞洲金融中心，我哋面對嘅問題同歐洲最窮嘅國家一模一樣。
佢俾我嘅感覺好博學，知我會南下「千窗之城」培拉特後，就同我講座城嘅歷史，對鄂圖曼統治嘅歷史相當熟悉，仲清楚過谷歌大神。一路講一路自豪國家曾經嘅輝煌，睇得出佢仲好愛呢個地方。
首都交通真係會嚇你一跳。同樣，又要轉車。我要去山上嘅古城，但停喺山下嘅新城。佢就揾咗同車幾個都要上古城嘅阿姨，叫佢哋帶我去。冇幾耐架車到，啲人當係最後一艘方舟咁湧上去。嗰幾個阿姨俾我上車先，之後坐喺我附近，驚我唔知落車。佢哋唔識講英文，但我哋仍可以做手勢同身體語言簡單溝通。
司機副手開車冇耐就過嚟收錢，圍返都係港紙幾蚊，我執緊散紙出嚟時，佢哋二話不說咁幫我俾咗。我個樣完全係黑人問號，即刻俾返錢人。不停塞錢過去，佢哋不停推返嚟，大家好似玩黐手咁，最後都係唔收。摷勻成個背囊都冇咩嘢有紀念價值，只好送個掛咗喺背囊、有自己個姓嘅熊仔俾同行個細路仔，當係小小心意。
一齊落車，佢哋同我道別後就行返上古城，感覺好唔真實。阿國人出名窮，但可以無緣故嘅熱情，完全唔計較，好有趣。
做咗咁多年香港人，一毫都計到盡，專業過精算師，俾錢一個三唔識七嘅人搭車，傻的嗎？但去到好窮，真心對人而且淳樸嘅國家，自己就變成咗心靈上嘅大鄉里。任你走過幾多浮華大地，影過幾多靚景，一段時間後就煙消雲散，反而人與人之間互動嘅內心感受就好難遺忘。
阿國嘅交通，都係窮遊嘅一種體驗。雖然神奇頂級超卓得過份，但永遠越混亂嘅經歷，之後諗起就越特別。
去旅行，每件小事都可以觸碰到內心深處，要記住，世界有壞人，亦有好人。
（文章為港語學第三屆廣東話徵文比賽參賽作品）