是咁的，其實小人真係好少去旅行（節儉是美德呀），一生人搭飛機都係3次咁多，不過其實我一家有個地方好鐘意去，唔係大陸，而係澳門呀。
我地基本上復活節同暑假都會去澳門，話咁啱今個復活節又去左⋯⋯
去澳門不外乎係去賭錢同大三巴啫，但係我地呢，其實去左差不多十次去只係去過一次大三巴咁多（不過賭錢就次次都有，唔係我咁啫）。我地去澳門，係去酒店同商場行的（唔好問我點解）。
不過今個復活節呢轉澳門，我覺得好難忘，點解？因為呢一轉有好多新嘢玩，有啲甚至仲係基本上無人會去嘅地方添。
行程一共三日，重點係不嬲嘅酒店商場行，同埋玩新野，仲有，去旅行實有嘅意想不到嘅事。
第一日重點係酒店商場，我自問港澳商場都算行得多，但係除咗奧海城個圓方，我嗰日行嗰啲商場真係可以話係最令我深刻。首先係新MGM，除咗人地有勁多獅子擺設好有佢主題，最正嘅係中間有個大廣場（跳廣場舞一流），四周圍有少少草木咁，再加上少少（應該係）天然光，令人就算處於室內都唔會覺得點樣（形容唔出，因為真係無嗰種感覺），反而好舒服。重點係，廣場中間有間比較開放式嘅甜品店，甜品店出面有個噴泉，噴嘅唔係水，而係朱古力泉，有白朱古力、牛奶朱古力同黑朱古力。你可能會覺得香港都有啦，真係成個大鄉里出城咁，不過我諗整得咁靚同華麗就真係未必多。跟住就係我最難忘嘅一個商場，永利皇宮喇。
點解我會咁難忘？有兩個原因，首先，纜車。如果問我細佬妹，去澳門最鐘意咩？我好肯定佢地一係答纜車，一係答酒店(唔知點解好像大家都有酒店情結)。
一開始上去搭我真係嚇到心都離一離，因為我其實有少少畏高，加上佢個樣真係無咩安全感（但個設計又有龍其實好靚)，下面仲要係個湖(法官大人我唔識游水架)，但係搭完之後覺得佢基本上有少少似一個遊樂設施，轉彎嘅時候都幾刺激，而且有景睇有音樂聽，真係幾成功。到左夜晚，佢仲有兩三場特別嘅表演，下面個湖會開始表演（即係啲水噴上黎咁），加上燈光，然後周圍會響起鐵達尼號首主題曲，營造一個好浪漫嘅場景。
第二個原因就係佢華麗嘅室內設計，唔知大家有無聽過Taylor Swift 有一首歌叫 delicate，個MV場景係一間都算華麗嘅酒店，唔知點解入到去我好有身處當中嘅感覺，而且你行幾步就有一嚿比較大型嘅裝飾擺設，打卡一流。
到左第二日，我地係想去睇新濠影匯個恐龍展的，點知係行下行下嘅時候，成全左我呢一趟最難忘嘅回億⋯⋯
我地唔知點解行下去左一條名為「海邊馬路」嘅馬路(其實係一個地方？)，好有墾丁民宿同迪欣湖嘅感覺，又有一啲白色藍色嘅小屋，再加上一個蓮花池，個地方又少人，好有詩意，令人不自覺想放慢腳步。突然抬高頭，除咗見到蔚藍的天空，仲見到一個奇怪嘅東東？！藍藍地銀銀地，好似一部升降機，我一開始以為係工程用，點解一行人行到去，搭得嘅？！上去嘅過程中，我有少少戰戰兢兢嘅感覺，嗰個地方真係冇乜人，好似冇乜保證⋯⋯到左之後，我地第一眼見到嘅竟然係⋯⋯一部汽水機？！再向遠處望，有一個平台(同屋苑樓下嗰啲一樣只差個遊樂場)，特別嘅係，幾乎全個澳門都在閣下眼底。賭場、大街小巷、近、遠、頭先經過嘅、熟口面嘅，都在眼底。
停留咗一陣，我地決定繼續前進，去睇恐龍展。
個恐龍展又係一個新奇嘅體驗，即場下載一個程式，然後用擴增實境同恐龍影相，又有實物嘅模型睇，仲有聲效(我聽到都無啦啦嚇咗一跳)，又係一個打卡嘅好地點。
至於第三日，我地基本上又係去咗坐纜車，再去碼頭食個飯(個雲吞麵又幾好食)，就咁返香港⋯⋯唔知點解，一陣莫名嘅失落感竟然會喺我嘅心入面。
我自己覺得，去澳門，我最鐘意嘅除咗係去玩，仲有同一齊去嘅親戚相處嘅時間，一齊去發掘新嘅地方，十個人坐埋一齊享受堆滿一桌嘅美食。其實無左佢地，我去玩唔會咁盡興咁興奮，亦唔會有一種充實嘅滿足感。去完一趟，代表又要等到下一次聚首一堂嘅時候先一齊又玩過。
寫到呢度，又心郁郁想去澳門~好彩仲有一個月就聖誕節， 又可以返去故地重遊感受一番。
邊個話旅行一定要去咁遠？對我嚟講，去澳門仲正過去日本。
（文章為港語學第三屆廣東話徵文比賽參賽作品）