今日係我同爸爸媽媽去日本旅行嘅第二日。我哋去咗淺草嘅雷門寺同晴空塔，又體驗咗著和服。真係又開心又興奮呀！
首先，我去咗著和服，著咗和服嘅我，真係又青春又靚女呀！ 之後，我著住和服去咗雷門寺打卡Post IG。我著住和服喺個廟裏面周圍行，似足個古代日本妹呀！ 雷門寺條街裏面有好多好嘢食，有抹茶雪糕、人形燒、草餅、玉子燒，而家諗番都流曬口水呀！當時我下定決心： 一定掃曬呢度所有嘢食！
仲著住靚靚和服嘅我，離開咗雷門寺之後，就直接去咗晴空塔啦。嗰度人唔係好多，所以我一去到就直接上到最高嗰層。一上到去，就見到好靚好靚嘅風景–喺成個東京地圖呀！東京迪士尼、美術館、商場，仲有傳統小木屋，都映入眼簾，令我大開眼界。我心諗，如果我住喺東京，就可以尋找我屋企啦！
我俯望住呢個咁靚嘅風景，突然之間有感而發： 原來由唔同角度望落去嘅景係唔同㗎。其實有好多野都係咁㗎。試下爬高啲、爬遠啲，話唔定會有更美好嘅嘢等住你呢。得閒嘅時候出嚟旅行下、輕鬆下，唔單止可以令到身心舒暢，仲可以擴闊視野。就好似晴空塔咁，如果你淨係留喺塔底，係永遠唔會係知道上咗去之後會有幾咁靚嘅風景㗎！
今次去日本真係令我大開眼界，一幕一幕好似相簿咁，永遠封印係我的記憶當中。我會永遠記得呢度咁優美嘅風景，更加會喺假期嘅時候，多啲同嗲哋媽同朋友去旅行呀！
（文章為港語學第三屆廣東話徵文比賽參賽作品）