殘陽西下，紅霞映天。我今日真係玩得好開心，我同朋友嘅友情亦都會更深一層。
今日係我生日，我一大朝早就同朋友一齊出發去迪士尼樂園玩。嗰度有各式各樣嘅機動遊戲，有過山車、跳樓機、海盜船……一入到去，我啲朋友提議去玩叫破喉嚨嘅過山車。我婉轉咁拒絕，因為我好驚過山車嘅離心力。朋友們都一一叫我試吓玩，但係我都唔肯。最後，我為咗唔好令朋友失望，就被迫去玩過山車。
過山車有好多人排隊，我心諗希望佢哋可以放棄，但佢哋不但無放棄，反而充滿期待咁耐心等候。終於輪到我哋，我好緊張，心臟怦怦亂跳。我合埋雙眼，雙手合十，願祝自己平安。
過山車終於開動，冇幾耐，車上傳來一陣尖叫聲，我開始大喊起來。喊多一陣，我開始攰了。坐我旁邊嗰個人唔怪異的眼神望住我，我忽然感到一份尷尬。雙眼紅腫嘅眼睛，喊到聲沙嘅喉嚨，不斷冒汗的掌心，令我覺得自己太誇張。我嘅心情冷靜落離，過山車亦都到站。呢次勇敢嘅嘗試，不得不令我嘅朋友佩服。
玩完過山車，我哋睇咗花車巡遊演出，仲有同米奇老鼠影相。我哋玩到黃昏就依依不捨咁離開，今次亦都令我朋友之間嘅友誼增加。遠方嘅夕陽依舊艷麗，就好似一瓶傾瀉於天際嘅紅酒，浸透咗雲彩。
（文章為港語學第三屆廣東話徵文比賽參賽作品）