日本，東京，千代田區，秋葉原。由五十年代嘅黑市，去到八、九十年代嘅電器街，再喺近十年變身做宅男聖地，簡直係一個神秘又夢幻嘅地方。而我亦喺呢度，有一段好難忘嘅經歷。
四年前，我剛剛大學畢業，決定同大學老死阿華去一星期畢業旅行，地點係東京。平時自己有睇開動漫畫，但一直無學日文，又無去過日本，於是就交畀日文LAK LAK聲嘅阿華去計劃行程。
斷估唔到，去到行程最後一日嘅朝早，我地為咗啲無聊小事而嘈交。最後阿華喺我面前劈低張機票，叫我夜晚自己去機場，然後就拖篋離開酒店。
果陣唔識死，心諗自己一個仲好啦，可以乘機去吓無放落行程嘅秋葉原。但一落到街，就開始淆底喇。平時慣咗跟住阿華搭車，我連電車站都唔識去，仲點去秋葉原？
好在，日本仲係用緊傳統嘅漢字系統，救咗我一命。我身上無紙，於是喺手心寫低秋葉原三個，見人就隊隻手出去。日本人亦好友善，知我唔識日文，都肯用身體語言教我點行，有個伯伯仲陪我一齊搭電車添。就係咁，我成功到達秋葉原。
一出閘，就見到街道兩旁嘅建築物，掛滿晒最新嘅動畫、遊戲宣傳海報。街機舖、同人誌店，隔幾步就有一間，街上仲有好多女僕，笑住咁派傳單招生意。果刻我終於明白，點解呢度叫宅男天堂。
我唔理三七廿一係咁掃貨，去到晏晝兩點幾，成個人散晒，先醒起自己連早餐都未食。一場嚟到，無理由去食豬扒飯咁頹架，於是我搵咗一間寫住有英文服務嘅女僕咖啡店去試吓。
果間舖喺6樓，我一出，就有個細細粒，紮住兩條馬尾，個樣幾清純可愛嘅短裙女僕，喺門口帶我入去坐低，遞上餐牌，用我聽唔明嘅日文，好快咁UP咗一大輪。我嘗試同佢用英文溝通，佢一聽到，就左望右望，然後皺晒眉擰擰頭，好似想道歉咁款。我知道大鑊喇，一定係現場無女僕識英文。
當時心諗，不如走啦，臉懵都無計。呢個時候，女僕用文法錯晒嘅英文問我喺邊度嚟，我惟有答佢「香港」啦。點知佢突然好興奮咁同我講︰「主人，我叫—嗚咪…我都識—少少——廣東話—架。」
我驚訝到擘大個口，唔識畀反應。嗚咪用半咸淡嘅廣東話同我講，佢阿媽係香港人，阿爸係日本人，所以喺阿媽度學咗少少廣東話。
喺我人生中最淤皮嘅一刻，竟然畀我撞著一個日港混血兒，簡直就好似遇到女神一樣啊。
多得嗚咪幫手，我先可以順利咁點餐。上飲品時，佢帶住我一齊唸日文咒語，好好玩；送蛋包飯時，我叫佢喺碟飯上面寫自己個名，結果佢寫咗個中文字「海」字。我先至明白到原來嗚咪呢個日文係海咁解。
好可惜，嗚咪識嘅廣東話有限，我地嘅交流都係一句起兩句止，好快佢就走咗。我一路爬飯，一路偷望嗚咪，見住佢同其他主人，用日文有講有笑，心裡面就好嬲自己唔識日文。如果唔係，就可以留住嗚咪，同佢傾多幾句，話唔定可以做埋朋友，再之後……唉，似乎諗得太多喇。
食到最後一啖，見時間都好晏，再唔出發去機場就趕唔切，於是就搖鈴準備埋單。嗚咪好快就過咗嚟，但佢手上拎嘅唔係帳單，而係一部即影即有相機，示意我同佢兩個一齊合照。結果張單當然甘啦，但可以拎到張相做留念，上面仲有嗚咪親筆寫嘅留言(雖然果刻睇唔明)，我就覺得幾貴都值。
埋完單後，嗚咪企喺門口，笑住咁鞠躬送我離開，我點點頭示意，講咗一句拜拜，就帶住悔恨，離開呢個夢幻之地。
返到香港，我第一時間報咗日文班，經過三年嘅艱苦奮鬥，我總算學識同日本人簡單溝通，仲漸漸對日本嘅文化、歷史產生興趣。之後喺陰差陽錯下，入埋香港嘅日資公司，實行邊做邊學日文。呢條路，喺我去日本旅行之前，又點會諗得到呢。
今日，我又再次來到東京。一落機，我就即刻搭電車衝去秋葉原，搵返之前去過嘅女僕咖啡店。坐低後，我左望右望，見唔到嗚咪，於是喺銀包拎咗我地兩個嘅合照出嚟，問吓其他女僕佢邊日會出現。點知其中一個女僕話，嗚咪上個月已經辭咗職。
只能夠好老套咁講句，有緣無份。
雖然無機會再見，但對於呢個改變咗我人生軌跡嘅人，我都想隔空祝福佢，希望佢喺呢個唔易搵食嘅城市，可以帶住笑容咁生活落去。
我望住張相，用廣東話細細聲讀出上面嘅字︰好高興認識你，多謝！
（文章為港語學第三屆廣東話徵文比賽參賽作品）