當日我望住後面微波粼粼嘅人工湖，成個地方山明水秀，鳥語花香，眼入面充滿希望，我話比自己聽：我一定會再返嚟。但係如今，我想再返都返唔到，因為依個城市，已經就快消失左，我依家擰轉頭，見到嘅只係「石屎森林」，嘈雜嘅汽車聲，人與人之間嘅爭拗聲。要去感受呢個世界，已經唔係之前咁容易。我講你一定唔會信，我去咗邊個地方，你一陣間就會知。
世界上所有嘢，都有機會發生。你有冇諗過我哋身處嘅地球——一開始係有一粒粒小塵埃而組成？有冇聽過「世上無難事，只怕有心人」？無論任何幾冇可能發生嘅嘢都有一定嘅機會有機會發生。我唔係講假架，因為，我就曾經經歷過啦。我曾經去過馬爾代夫——一個超靚嘅地方。
我自細都想做一個導遊或者探險家，因為我想去探索呢個世界美麗嘅一面。所以，我二話不話，就拉咗我三個探險家朋友同我一齊去。
經過一陣風浪，我地眼前出現一個島嶼，遠睇已經見到有一種好warm嘅感覺。其實我都唔係好識形容，因為嗰度實在太靚啊。遠睇，佢好似一個生機勃勃嘅少女，身上一棵棵樹向遠來嘅旅客招手。我哋慢慢靠近，深藍嘅漸漸變成湖水綠色，漸漸變成黃綠色，跟住就係一個一望無際嘅沙灘，簡直令人飽覽無遺。我哋幾個踏入嫩滑嘅沙灘，行入我哋居住嘅酒店。在喺酒店入面，湛藍嘅海水盡收眼底。我哋換一套衫，就走去水面啦。
我哋就入水入面，一對魚群即刻散開，好似有怪獸入侵咁樣。我潛入去之後，睜開自己對眼，哇——簡直唔敢相信世界上有咁樣嘅世外桃源，水底嘅世界。突然，一條鯊魚係我面前游過，咦？點解佢冇食我嘅？原來依度啲鯊魚經過長時間嘅培訓，只會食人類比嘅肉但係唔會食人。有條海豚又過嚟我嗰度，叫我捉住佢，然後跟住佢一齊游。
我捉住隻海豚，原來啲海豚嘅叫聲，係：「we we」我覺得海豚真係好聰明，佢哋用聲波嚟傳送自己嘅訊息。一隻巨型魔鬼魚係我下低經過。
我哋上咗岸，陸地景色睇下都好。木板做嘅碼頭，陽光係樹影婆娑之間射落嚟。我哋一路行，個碼頭就好似一隻溫暖嘅手保護着我哋。多謝神賜比我地咁美好嘅天氣，多謝神賜呢個旅程俾我。
咁美好嘅大自然唔通就比啲全球暖化而糟蹋？如今，全球暖化愈嚟愈嚴重，南北極嘅冰塊逐漸融化，海平面上升，都就快要淹沒一啲低窪地區，好似馬爾代夫咁。唔通你忍心比呢個咁美好嘅地方消失？所以，我地要有保護地球嘅意識，由小做起。我地要有低碳生活，減少垃圾同碳排方。我地仲要注意電器上面貼嘅能源標籤。
我地地球嘅天然資源就快要耗盡。我地要好好保護地球，唔可以再被人破壞啦！再破壞，所有美麗嘅地方，所有世外桃源，都會比我地毀於一旦。我地各國要携手合作，守護我地嘅未來。馬爾代夫，我一定會救你㗎。
（文章為港語學第三屆廣東話徵文比賽參賽作品）