摩星嶺曾經係駐港英軍軍事要地，極具歷史意義。呢個地方位於中西區，亦都係我所居住、最愛嘅地方。西區係香港歷史最悠久、最富傳統特色嘅地區之一，直到而家，西區仍然保存咗唔少引人入勝、奪目耀眼嘅靚景，賦予香港市民享受生活嘅黃金機會。
而更具意義嘅係，呢到係我同佢邂逅嘅地方。時光荏苒，日月如梭，時間嘅流逝依舊唔會令我唔記得嗰一日。好清楚咁記得，我參觀緊喺二次大戰嘅時候留低嘅痕跡——唔同嘅炮台遺址同埋一啲好特別嘅軍事設施嘅時候，佢帶著一副「文青眼鏡」，背囊扣著一個口罩嘅飾物。我第一眼睇到佢，心入面嘅小鹿就已經喺度不停咁周圍撞。終於鼓起勇氣，鼓勵自己要充滿自信咁去「抄牌」，點知又真係成功咗。
返到屋企，我猶豫咗好耐，好想了解佢更多，但奈何都仲係覺得好尷尬。同朋友傾完計之後，我決定要跳出自己嘅舒適圈，唔再做「淆底獸」。解鎖咗手機嘅密碼鎖，㩒入咗一個程式，發送咗「你好」兩個字。我一直凝視住手機有冇彈出訊息，過咗幾分鐘，佢答咗我「妳好啊」。我欣喜若狂，心諗：今次真係行運啦！傾計傾咗大概十幾分鐘，我喺對話之中揣摩到佢嘅悲觀性格，仲知道原來佢患有解離症，啲人都以歧視嘅目光去睇佢，冇人願意同佢做朋友。佢話自己成日都聽到一把聲，叫佢唔好再害人。
願傾盡所有，化身一柔月，伴隨你左右。我覺得精神病係病，患有呢類型病嘅人已經夠辛苦，唔應該二度傷害。我循序漸進咁走入佢嘅生活當中，喺佢覺得難受嘅時候安慰佢，喺佢控制唔到自己情緒嘅時候開導佢，喺佢想要自殺嘅時候比一個擁抱佢。一齊共同進退，逆境中自強不息。
於是就係咁，山上一個女子，搵到自己嘅真命天子，得到永恆不變嘅幸福。世界真係好細，完全冇估到自己會係喺成長嘅地區遇見佢。
我同佢十指緊扣，飽覽著香港島西邊嘅海景，認定係佢了。