最新消息
請支持港語學Youtube Channel,集氣突破1,000訂閱!
EMAIL
gongjyuhok@gmail.com
報料Whatsapp
+852 51868627
支持我哋
清單
  • 首頁
  • 中文教學語言資料庫
    • 小學普查
    • 中學普查
    • 中小學普查
    • 大學普通話政策
    • 調查背景及方法
    • 注意事項
  • 港語文集
    • 普教中問題
    • 守護港語
    • 粵語研究
    • 語文教學
    • 環球語言新聞
    • 徵文比賽
      • 中西區廣東話徵文比賽 參賽作品目錄
  • 中文補習
  • 學港語
    • 香港中文實用文寫作教學
      • 宣傳文字
      • 評論
      • 專題介紹
      • 報告
      • 建議書
      • 新聞稿
      • 會議文書
      • 演講辭
      • 規章、指引、說明
      • 周記、日記
      • 書信
      • 便條
      • 通告、佈告、啟事
    • 廣東話歇後語大全
  • 港願樹精品
    • 手工蛋糕
    • 餐飲到會
    • 我嘅帳戶
    • 購物車
    • 埋單
    • 條款及細則
  • 支持我哋
    • 場地租用
    • 捐款支持
    • 成為義工

《靈芝》 黃可偉

喺一個微陰嘅日子,我行上英皇佐治五世紀念公園。公園就喺一個好斜嘅山坡上面,橫跨兩條高低唔同嘅街道,喺上面高街一邊就係以往嘅有麻石外牆嘅鬼屋,而喺下面醫院道一邊,就係贊育醫院,連接高低兩條街嘅就係東邊街,佢哋圍起一塊地方,構成一個方方正正嘅地臺。

  我經過贊育醫院,走上斜路,再行入公園,喺公園嘅斜坡上面有高高低低嘅小路貫穿其中。小路有啲濕,而且因為上面有好高嘅、生喺牆上嘅石牆樹阻擋咗濕氣蒸發,令依一個大樹下面嘅地方都仲瀰漫住濕氣,令公園依一邊顯得好清涼。石牆樹好似靈芝,樹冠好大,覆蓋甚廣,樹榦雖然粗,不過喺濃密嘅樹葉下面顯得好似靈芝嘅幼小軀幹,於是我叫石牆樹做「靈芝」。

  其實靈芝本來係喺一啲腐敗嘅木頭泥土上面吽出嚟,唔知點解後尾就變咗仙人賴以長壽嘅養生寶貝。相傳蓬萊仙人以此為食,所以秦始皇聽信徐福之言,派三千童男童女同一批工匠去咗日本搵不死藥。當然藥冇搵到,徐福佢亦因此留咗喺日本國。喺《白蛇傳》入面,白蛇白素貞喺中秋佳節嗰時同相公許仙邀月開懷暢飲,共度良宵,點知白娘子不勝酒力,現出原型,令許仙嚇死咗。為救相公,白蛇同青蛇大戰護山仙童以求仙草,許仙服用之後得以生還,而依棵仙草就係靈芝。喺唔同嘅典籍入面靈芝都可以救人一命,不過可以起死回生嘅仙草又點會畀你哋咁容易搵到?

  真嘅仙草難求,不過人間真有其物,好似仙草嘅靈芝就容易買到,醫院道依幾棵有六七層樓高嘅石牆樹,其實就係放大版嘅靈芝,同樣有救命之效,不過佢救嘅,係半山區一塊小小地區嘅肌理同生命。當整個中西區都喺度不停大興土木嘅時候,正正係有咗依幾棵樹,令依一個區域得以保持寧靜悠閒嘅格調。落雨嗰時,我哋喺佢哋下面行,唔怕雨揼濕,到烈日當空,又有佢哋為我遮蔭。其他地區嘅樹木有唔少都因為栽種不善、保養不周,紛紛被斬或冧落嚟嘅時候,佢哋依然生機勃勃,守護住依一個小地方。

  依度就好似停留喺六七十年代嘅舊香港,令我冇經歷過依一個時代,都可以由幾棵高大茂密嘅樹、古老嘅石牆同街燈,重構當年嘅氛圍。張愛玲喺〈童言無忌〉講過:好似我哋咁樣生長喺都市文化嘅人,總係先睇見海嘅圖畫,後尾睇見海;先讀到愛情小說,後知道愛。我哋對於生活嘅體驗往往係第二輪嘅,借助於人為嘅戲劇,因此喺生活同生活嘅戲劇化之間很難劃界。當我見到依幾棵樹,就知道當年嘅香港係點樣。不過張愛玲話生活嘅戲劇化係唔健康嘅,但係對香港人嚟講戲劇化生活就係苦中一點甜,我哋可以由幾棵老樹,重拾當年仍然美好嘅舊香港。生活喺當下殘忍而破裂嘅社會經驗入面,大家唔係想死,會發癲,就係變得目空一切、麻木不仁,有依幾棵樹,令我哋有一個可以發夢嘅地方重拾美好嘅過去,我哋先有一個庇護所,令大家仍然可以堂堂正正做一個良善嘅人,所以又點可以唔話依幾棵樹係靈芝?佢哋同樣救急扶危,救嘅係人心。

  正所謂「碧海青天夜夜心」,相傳后羿由王母娘娘嗰度得到靈芝長生不老藥,但係嫦娥偷食咗,結果嫦娥輕飄飄咁奔向月亮,過佢嘅不老生活。月亮嘅廣寒宮寂寞冰冷,令嫦娥後悔,不過我喺冇乜人嘅下午,行過陰涼嘅大樹下面,就覺得依幾棵樹可以救贖平日大家忙到抖唔過氣嘅心靈。由七十年代前嘅小商埠,變成繁忙擠擁嘅國際大都會,依幾棵大樹都依然如幾十年前一樣,一貫守護住依個小社區,假如中環係后羿繁榮嘅封地商丘,咁人稀嘅英皇佐治五世紀念公園就係荒涼嘅廣寒宮。行過見證殖民地歷史嘅樹,我就好似待守皇宮嘅白頭宮女同啲細孥講:嗱!喺香港主權移交之前廿幾年,香港曾有一段燦爛嘅好日子,對比返而家嘅香港,佢哋大概會覺得依個只係遠古嘅傳說。

  依個時候清潔阿姐經過,見我喺度望住啲樹發吽哣,佢就吟吟沉沉咁話:屌你老母,阻住我掃樹葉。當然啦,主權移交後政府清潔工作外判,人工少工時長,十日人工抵唔過一盒靈芝孢子,阿姐要掃通地樹葉,掃到唔發火就假。哼!

話題

中國教育 中文 內地用語 出版 出版自由 報導 報道 大學生 大陸用語 廣州話 廣府話 廣東話 廣東話報道 廣東話文學 廣東話新聞 教育 新聞 普通話 浸大 浸大山神 浸大排名 浸大普通話 浸大校長 浸會大學 港語學 研究 粵語 粵語文學 編輯 蘋果日報 語文 語言保育 陳樂行 香港 香港人 香港人文化 香港大學 香港大學生 香港政府 香港教育 香港新聞 香港浸會大學 香港浸會大學普通話水平測試 香港特別行政區 香港語言
  • 首頁
  • 中文教學語言資料庫
    • 小學普查
    • 中學普查
    • 中小學普查
    • 大學普通話政策
    • 調查背景及方法
    • 注意事項
  • 港語文集
    • 普教中問題
    • 守護港語
    • 粵語研究
    • 語文教學
    • 環球語言新聞
    • 徵文比賽
      • 中西區廣東話徵文比賽 參賽作品目錄
  • 中文補習
  • 學港語
    • 香港中文實用文寫作教學
      • 宣傳文字
      • 評論
      • 專題介紹
      • 報告
      • 建議書
      • 新聞稿
      • 會議文書
      • 演講辭
      • 規章、指引、說明
      • 周記、日記
      • 書信
      • 便條
      • 通告、佈告、啟事
    • 廣東話歇後語大全
  • 港願樹精品
    • 手工蛋糕
    • 餐飲到會
    • 我嘅帳戶
    • 購物車
    • 埋單
    • 條款及細則
  • 支持我哋
    • 場地租用
    • 捐款支持
    • 成為義工
© 2022 港語學 版權所有