光仔
「唔該！我想問皇后大道中喺邊度？」光仔問一個十幾歲嘅女仔。
「不知道！」語氣好重咁應光仔就走咗。
光仔皺眉，繼續行，時不時望吓佢嘅筆記簿，又時不時望吓人潮如鯽嘅中環。
企咗一陣，有個女仔拍佢膊頭，好溫柔咁問：「我有冇嘢可以幫到你呀？」
呢個女仔同頭先嗰個大相逕庭。
「唔好意思，我搵緊嗰條上半山嘅扶手電梯。」
「我帶你行？你可以叫我小詩。」女仔微笑答。
「我叫光仔。」
呢一刻光仔真正望清小詩。小詩應該廿歲頭，白裡透紅嘅皮膚，笑起上嚟好迷人。
「係呢，其實光仔你想去邊？」
「我想去返我父母以前去過嘅地方，其中一個係些利街清真寺。」
「些利街我知喺邊！反正我今日放假，我都想四圍行吓，不如一齊？」
當然好啦！
行經大館，好多遊客著住旗袍喺嗰度影相。
同筆記簿寫嘅一樣。光仔心諗。
過咗伊利近街，遊客相對減少。佢地兩個一直向半山嘅方向邁進。
「經過堅道，沿住扶手電梯，右手邊有條列拿士地臺，對面就係淺綠色嘅清真寺。」光仔照住記事簿讀。
兩人企喺列拿士地臺，望住扶手電梯嘅方向。清真寺就喺電梯後方。
「列拿士地臺呢個名，有人以為係當時香港仲喺係英國殖民地嘅時候，因為中國藉翻譯官慣由右至左寫字，所以將原本叫 “Alexander Terrace”，變咗做 “Rednalexa Terrace”呢個咁古怪嘅街名。」光仔好興奮咁講。
「不過有人研究，其實係為咗記念19世紀捍衛非洲人民人權嘅Robert Alexander Young，佢將居住喺非洲以外嘅人叫 “Rednaxela”人而命名。」小詩補充。
清真寺門口有守衛看守，不過冇阻佢地兩個進入。
「香港開埠冇耐，英政府喺當時同係英國殖民地嘅印度，招攬入香港軍警，當中有回教徒。而呢一間位於蘇豪區嘅清真寺就係全香港第一間清真寺。」光仔滔滔不絕咁講。
行上樓梯，有啲教徒喺寺旁洗手，有啲就除鞋入緊去寺入面，有啲喺旁邊空地教緊小朋友誦經。
正如記事簿入面所講：廟入面中間壁龕位置係俾長老誦經嘅地方。圓拱型嘅設計，形成一個自然嘅擴音器，令誦經嘅人唔駛用咪都可以將聲音傳到每一個角落。
筆記簿最後一頁寫住：喺同一個社區，除咗香港人之外，仲有好多唔同嘅少數族群，佢地都係屬於呢個社區。我哋要好好認識屬於我哋嘅地方。
光仔問小詩：「我仲有其他地方想去，你會唔會得閒一齊去？」
小詩
「都已經2050年啦！還有人不說普通話！」
小詩聽到路過嘅女仔自言自語。
難得今日放假，小詩計劃好去中環嘅咖啡室睇吓書，飲吓咖啡，悠閒咁過一日。
經過中環街市，小詩見到有個廿歲尾嘅男人，留咗少少鬚，成熟得嚟又幾有型。男人一睇就知唔係本地人，拎住一本筆記簿同一部單反相機。佢企咗喺中環街市，想舉步嘅時候，又收返步。
喺中環不嬲有好多嘅遊客，大部分都係拖住喼喺唔同嘅藥妝舖頭前面碌嚟碌去。好少會好似眼前呢一個男士咁。好奇心嘅驅使下，就睇吓有冇嘢可以幫佢。
男人自我介紹叫光仔，香港出世，英國長大。爸爸媽媽喺佢出世之後冇耐，過咗去生活，一直都冇返過嚟。
小詩帶光仔走入中環街市，穿過行人天橋，到達扶手電梯起步點。
小詩指指天橋下面條街，同光仔講，「呢條街移家叫『人民中路』，25年前就改咗名啦，後生一輩都唔知佢原本個名。」
去到列拿士地臺，光仔雙眼發光，如獲至寶咁講：「呢啲故事我聽咗好多年，我父母一直都唔俾我嚟香港。佢哋因為後生嘅時候吸入太多中國造嘅催淚煙，搞到身體越嚟越差，一年之前相繼走咗。我喺佢哋嘅遺物入面，搵到呢本記事簿，上面嘅每一個關於香港嘅故事我由細聽佢哋講到大。佢哋成日都話香港好靚，好特別。佢哋真係好鍾意香港。我諗極都唔明點解佢哋要離開。」
小詩冇同光仔講，再過多幾個月，呢度都將會改名，政府覺得呢度太過有殖民色彩。
清真寺入口嘅兩個守衛盯實佢兩個，可能聽到光仔講佢哋唔認同嘅歷史。光仔應該太興奮見唔到。
2025年，政府要壓制宗教自由，所有天主教、新教、回教等嘅宗教場所全部都被掌控。所有教徒都要入愛國教會，唔願意、唔聽話嘅將教堂拆除。好彩嘅係清真寺係二級歷史文物，所以先可以保存。好多人都已經唔知蘇豪區有間清真寺，因為入面都已經唔係真正回教徒去嘅地方。
廟入面都係愛國教徒，小朋友讀嘅係修改過嘅可蘭經，佢哋亦都冇得再學阿拉伯文，只學中文。佢哋嘅文化唔知由幾時開始慢慢咁淡化，變變咁被消滅，就好似香港卅年前一樣。
臨同光仔分別之前，小詩向佢講：「我好耐都冇見過本地人對香港嘅故事咁熟悉，我哋生活喺呢一個城市，圍繞我哋嘅一條街一個建築物都有佢嘅故事。如果卅年前有多啲好似你父母嘅人記住呢啲故仔，香港或者唔會變成移家咁。你比我哋每一個更有資格做香港人。」佢講香港人特別細聲，好驚俾其他人聽到。
小詩送咗佢本書俾光仔。入面有一句小詩好鐘意。
「人與極權嘅抗爭，係記憶與遺忘嘅抗爭。」