「小妹妹，你一個人喺度做乜呀？」一個七、八歲嘅細路女䁋埋眼企喺路邊，唔通同屋企人失散咗？
「姨姨，一齊嚟涼冷氣吖！每次凍肉舖打開道門，就會有陣好凍嘅白煙飄出嚟，我夏天最鍾意行呢度，媽咪話係過冷河喎！」細路女陰陰嘴咁笑咗一下。但呢度冇凍肉舖，亦見唔到咩白煙。
「呢度路窄，又有好多叔叔推車仔運貨，你唔好企呢度喇，陣間畀啲車仔撞親就弊喇！」佢唔係好理我，笑瞇瞇咁就轉身行咗去。「你去邊呢？一個細路女周圍行好危險㗎！」「唔驚喎！我阿爸間印刷舖喺差館上街，我行慣行熟啦。我想去探啲龜仔呀！」
龜？莫非佢要去對面個荷李活道公園？我靜靜地跟喺佢後面，驚佢亂過馬路；但佢居然左轉屈咗入新街，左望右望好似搵緊嘢咁。「姨姨，你有冇見嗰檔賣缽仔糕嘅車仔檔？佢平時喺呢個路口開檔㗎！」而家街邊仲有缽仔糕賣？我自己都好多年冇食過喇，細個最鍾意食啡色黃糖味，冇白色隻味咁腬，用竹籤叉住食特別有風味。
「唉，仲諗住醫吓口痕㖭！」妹妹人細鬼大，學足大人講嘢嘅口吻。講完佢又大搖大擺咁行落呢條暗斜嘅新街。我唔放心佢一個細路周圍走，又跟咗上去。「點解你唔上番行人路，要行馬路中間呢？」「吓？乜有分嘅咩？不過呢條路都冇乜車嘅，有車咪行埋一邊囉！個個都係咁行㗎啦！」確實上環好多小路都係咁，有啲住新界嘅同事初初都睇唔慣我成日行落馬路。
「你行呢度，唔怕見到棺材咩？」經過見到殯儀店裡面擺咗一副副棺材，唔嚇親就假。細路女招積咁話：「成日都見㗎啦！出面街有時仲有黑箱車添！姨姨你驚就行左邊啦！」驚？我驚你驚咋！估唔到個細路咁大膽，睇嚟佢真係地頭蟲。
一個轉彎落去，已經到咗皇后大道西，左轉又上雀仔橋。「定係佐治五世公園有龜睇呀？診所隔籬有條捷徑，一嘟過去就係東邊街，近好多㗎！」「你話國家醫院？今日唔行嗰度喇！行大馬路有嘢睇！」細路女又一支箭咁標咗落橋底巴士站個彎位度，嗰度有幾間元寶蠟燭店，呢期近中秋，仲掛住好多花哩花碌嘅燈籠添。
細路女停咗喺一間舖頭嘅轉角位，烏低身唔知睇緊紙紮定燈籠。到我行到過去，佢又揞住嘴、笑笑口咁行咗去。行遠少少佢就話：「嘻嘻，我頭先扮等你，咪可以停喺度睇啲婆婆化妝囉。媽咪話，係咁啤住人好冇禮貌㗎！」我又俾佢嚇一嚇：「點會有人喺街邊化妝呀，你見到紙紮公仔呀？」「唔係呀！啲婆婆會坐喺啲凳仔度，另一個婆婆就會搽到佢成塊面白『漇漇』咁，再搵條線吓、吓⋯⋯」細路女一路講，一路指手劃腳。「哦，係咪線面呀？嗰啲唔係化妝，係傳統嘅美容，可以去面毛，塊面又會白滑啲。不過，而家仲有線面？頭先見唔到喎⋯⋯」
細路女冇理到我嘅疑惑（同少少驚嚇），繼續沿大馬路向西行。經過森美餐廳，門口個牛牛霓虹招牌早幾年已經拆咗，細路女就好興奮咁話最鍾意上閣樓鋸扒。過咗東邊街，細路女冇轉上長命斜，又繼續向西行，仲邊行邊一輪嘴咁講，自己識得喺正街幫手買餸、買半肥瘦叉燒加料，好似好醒咁⋯⋯直至見到黃底紅字、非常搶眼嘅「趙醒楠」跌打館招牌，細路女忽然大大聲咁嗌咗句：「趙醒楠有落！」即刻好似發現新目標咁，衝咗落去西邊街，直奔對面嘅七號差館。
喺差館嘅側邊，佢隔住個鐵絲網裝入差館裡面。果然，地下有個小小嘅水池，養住十幾廿隻龜。「我以前返靈恩幼稚園會經過呢度，成日睇龜仔㗎！」我望住對面均益三期，忽然諗起我媽同我講嘅一個故事：「你知唔知喺正差館對面棟樓，曾經有一大單藏毒案？正所謂最危險嘅地方，亦係最安全嘅地方⋯⋯」但而家德輔道西兩邊擺咗好多巨型嘅水馬，我已經開始分唔清，邊度係安全，邊度係危險⋯⋯
「媽咪，你一個人喺度做乜呀？」童稚嘅聲音將我從回憶中帶番嚟現實，低頭就見到阿囝，佢喺對面國光書局買完文具就出嚟搵我，而原先嘅細路女已經唔知去咗邊。我就同阿囝講吓差館養嘅呢啲龜，佢哋可能已經喺白色瓷磚鋪出嚟嘅水池裏面，浮游咗好多年；或者，有啲大龜其實係我返幼稚園嗰時見到嘅龜仔，長到而家咁大隻呢⋯⋯
最新消息
%d 位部落客按了讚：