聽日就要離開呢個住咗30年嘅社區，趁搬遷事宜大致搞掂，兼且腦袋想放空一吓，決定喺呢附近行多最後一次。
我行上滿佈小店嘅斜路，一堆近呢幾年先湧現嘅西式咖啡店同餐廳盡入眼簾，文青喺度打卡、外國人喺度歡暢閑談、年輕情侶喺度拍拖，熱鬧非常。自從某一年地鐵開通之後，以前勁難去嘅西環霎時間成為咗打卡熱點，成日聽到朋友講「你住呢區真係好幸福，有好多餐廳同推介熱點，我都係慕名而來」。每一次都換來我老實不客氣嘅回覆，笑住話老街坊嘅眼睛係會自動飛過呢啲新店，反而日去夜去嘅係喺店舖中間屹立不倒嘅街坊茶餐廳、由細幫襯到大嘅傳統潮州麵店牛腩麵店、同埋同啲老闆識咗好多年嘅士多。腦海中仲惦記着以前喺正街角落頭嘅柱記粥店、喺斜路上逢星期一三五先開嘅齒恆香蛋卷小檔、喺東邊街好似叫阿貴嘅裁縫叔叔店，仲有以前放學成日去逛嘅國光書局。外邊嘅人覺得呢幾條斜路就係新興嘅soho，區內嘅人睇到嘅，大概就係一條又一條好斜但係又要行晒先返到屋企嘅路。
我鍾意沿住般含道走到香港大學，每年秋冬天去到東閘旁邊嘅車路，就會聞到一陣陣嘅桂花香。細個對香港大學趨之若鶩，見到校園又大、建築又靚，考入全港最高學府成為咗少年時嘅目標。而家睇返轉頭，香港大學係一個好地方，唔在於佢嘅建築有幾歷史悠久、有幾宏偉，而係喺入邊你會認識到志同道合、同聲同氣嘅同學，一齊揮霍過青春歲月、一齊討論過點樣為呢個城市同為自己嘅理想而奮鬥。嗰種搏盡精神，先係香港大學嘅精髓。
如果有時間嘅話我想再行多次上西高山，由香港大學計起向山頂行一個鐘倒就會到。西高山嘅景色美絕全港，超過180度盡覽香港景色，香港島、九龍、新界、維多利亞港、甚至係嗰啲日後即將會被大規模無情發展嘅島嶼，都睇得一清二楚。我想講住呢區最幸福嘅事情莫過於此，行一個鐘嘅路，喺中西區最高處，睇到呢個世界最令你最難以忘懷嘅風景。
行吓行吓原來已經過咗四個鐘，細個嗰時以為時間好多，有啲路「你今日行唔完，咪上返屋企聽日再探索過囉！」
大個咗就知道，生活可以俾幾多瑣碎嘅事去充斥住，生存需要幾多勇氣同精力去堅持。舉家離開呢個決定並唔容易，但為咗下一代有更自由嘅生活，喺今日嘅香港嚟講，好似並無其他更好選擇。好好告別呢度嘅一切，好好記住呢個細小但富有人情味嘅社區，每段路、每條街、每間舖頭、每個熟悉但唔認識嘅街坊、每個回憶都成為我日後生活嘅養分，記得自己嘅根，就會拼命搵到出路。